.png)
Nga Gazeta Si - Ndryshe nga dy muaj më parë, kur mohoi nxitimthi lajmin e medias greke "Kathimerini", se ai po negocionte me kryeministrin Edi Rama me qëllim drejtimin e përkohshëm të Bashkisë Himarë, Vangjel Tavo, mbrëmjen e të mërkurës, heshti.
Një vendim i qeverisë (i shpërndarë më herët në rrjetet sociale) njoftonte se Rama e kish emëruar atë prefekt të qarkut Vlorë. Një manovër kjo e njohur e kryeministrit për t’i katapultuar më pas disa prej tyre si kandidatë për kryetarë bashkish.
Në rastin e Vangjel Tavos merr më shumë kuptim se asnjëherë artikulli i Kathimerini në fillim të janarit ku shkruante me detaje se si Vangjel Tavo, anëtar i minoritetit grek, (aktualisht i shkëputur nga politika), mori një telefonatë nga Edi Rama për tu takuar.
Tavo e pranoi ftesën, megjithëse marrëdhëniet mes tyre nuk ishin të dikurshmet qysh se ai ishte larguar nga Partia Socialiste për tek LSI si deputet në shumë vite.
Nxitimit për takim, Rama i kishte paraprirë në mes të dhjetorit me një tjetër telefonatë me Tavon.
Me pak fjalë, sipas “Kathimerini”, Rama i kishte kërkuar Tavos në takim të marrë përsipër detyrën e kryebashkiakut të përkohshëm gjashtëmujor të Himarës, aq sa do të zgjaste edhe gjyqi ‘Beleri’.
Vangjel Tavo e mohoi artikullin, me argumentin se nuk kish dëshirë të angazhohej në politikë. Ndryshe nga Tavo, kryeministri Rama nuk bëri të njëjtën gjë. Kryeministri i la të hapura negociatat, kur tha se nuk mund të komentonte lajme që vinin nga Greqia dhe jo nga zyra e tij.
Emërimi jo (aq) i papritur i Vangjel Tavos në krye të prefektit të Vlorës të çon ujë tek një tjetër detyrë, ajo e Himarës, për të cilën Rama gjen zgjidhjen me Greqinë nëse Apeli i GJKKO-së lë në fuqi vendimin për dy vjet burg ndaj Fredi Belerit i akuzuar për blerje votash.
As Vangjel Tavo, që ‘nuk kish dëshirë të angazhohej më në politikë’, nuk mund të ‘riskojë’ yshtjen e tij të shprehur “për t’i shërbyer komunitetit si mjek”, apo marrëdhëniet njerëzore të krijuara me politikanë, që nuk i përkasin PS-së, për një angazhim në nivel prefekti. Kjo do të ishte naive nga ana e tij. Dhe jo vetëm.
Ish- ministër i Shëndetësisë, ish- deputet dhe i angazhuar më shumë se 20 vjet në politikë, fillimisht si i PS-së pastaj i LSI, ai, i cili figurën kryesore të politikës shqiptare, ka konsideruar ‘Ilir Metën’ dhe i lidhur ngushtë me zonat e Gjirokastrës, Tepelenës, Këlcyrës, Memaliajt, Libohovës apo Dropullit, nuk mund t’i jepte kuptim angazhimit të tij të beftë për më tepër në një zonë të cilën Tavo nuk e ka ‘shkelur’ asnjëherë si qarku i Vlorës apo më tej Himara.
Emri i Vangjel Tavos për të cilën ‘Kathimerini’ shkruante se ai e kishte njoftuar paraprakisht Greqinë për bisedën me Ramën, mund të jetë zgjidhja e ngërçit mes dy vendeve, sa kohë fqinji e ka kanalizuar çështjen ‘Beleri’ më shumë si debat ndaj një minoritari sesa si çështje juridike. Kryeministri ndërkohë ka ndërmarrë dy lëvizje.
Së pari; Rama ka thyer tezën duke i ofruar Greqisë një tjetër emër minoritari.
Së dyti; ai ka zbutur paralelisht tonet me Greqinë.
Në një konference për mediat pak kohë më parë, Rama nuk komentoi çështjen ‘Beleri’ me argumentin se pret shkallën e dytë të gjyqësorit. Por ra në sy një reagim i tij për vizitën e kryeministrit grek Mitsotakis në Ukrahinë ku në vendin ku takoi presidentin Zelensky raketat ruse u lëshuan vetëm 200 metra larg.
Kathimerini shkruante se sulmi me ‘mesazh’ kishte shënjestër presidentin e Ukrainës, Zelensky.
Kryeministri shqiptar Edi Rama i shtoi edhe më shumë tonet nga interpretimi grek. 24 orë pas ngjarjes, ai e dënoi ashpër sulmin, një reagim, që për nga përmbajtja, u kuptua krejtësisht llastues, në thelb aspak i nevojshëm, ndaj kryeministrit të Greqisë.
Lëvizja e Ramës me Tavon, vjen edhe në kohën kur kryeministri grek Mitsotakis dhe Partia e tij Nea Demokracia, po mendojnë që Fredi Belerin, edhe pse në burg në Shqipëri, ta kandidojnë për zgjedhjet e Parlamentit Europian që mbahen këtë qershor. / N.P
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
