Gazeta Si - Shtatë persona mbetën të plagosur mbrëmjen e kësaj të shtune në Durrës, pasi u përfshinë në një aksident masiv. Ngjarja ndodhi pranë mbikalimit në zonë e Plepave, aty ku 4 makina u përplasën më njëra-tjetrën.
Në një njoftim për mediat, policia tha se 6 prej të plagosurve morën ndihmë mjekësore në spitalin e Durrësit.
Ndërsa një grua 61-vjeçare u transportua drejt Spitalit të Traumës në Tiranë. Fatmirësisht, të gjithë janë jashtë rrezikut për jetën.
“Rreth orës 20:10, në lagjen nr. 13 Durrës, në aksin rrugor Plepa-Kavajë, janë përplasur 4 automjete me drejtues shtetasit A. D., G. L., E. M., dhe E. H. Si pasojë e përplasjes kanë shkuar për kontroll mjekësor në spitalin rajonal në Durrës, 6 shtetas pa probleme për jetën, ndërsa shtetasja Xh. H., 61 vjeçe është transportuar në Spitalin e Traumës në Tiranë, jashtë rrezikut për jetën”, tha policia e Durrësit në një njoftim.
Në vendin e ngjarjes shkuan shërbimet e ambulancës dhe policisë. Kjo e fundit, përveç hetimeve për të zbardhur rrethanat e këtij aksidenti të shumëfishtë, ndërhyri edhe për të normalizuar qarkullimin e automjeteve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.