.png)
Humbja e vendeve të punës, rënia e të ardhurave, perceptimi pesimist dhe i pasigurt për të ardhmen janë arguementet që bankat e nivelit të dytë japin për rënien e kërkesës për kredi nga ana e individëve në tremujorin e tretë të vitit 2020.
Raporti i Vrojtimit të Kredititmit të Bankës së Shqipërisë tregon se, kërkesa e individëve për kredi u perceptua me rënie edhe në tremujorin e tretë të vitit, si për kredinë konsumatore, ashtu edhe për financimin e blerjes së banesave.
Raporti parashikon që në tremujorin e fundit pritet një gjallërim i kërkesës për kredi në të dyja kategoritë, për financimin e konsumit dhe blerjen e banesave.
Sipas gjykimit të bankave, nevojat më të ulëta në financimin e konsumit dhe të blerjes së banesave, zhvillimet aktuale dhe të pritura në tregun e banesave, si edhe shtimi i kredive në bankat e tjera, sollën rënien e kërkesës për kredi në tremujorin e tretë të vitit.
Kurse si faktorë që kanë zgjeruar kërkesën për kredi të individëve këtë tremujor janë raportuar përmirësimi i besimit konsumator, niveli i përgjithshëm i normave të interesit, si edhe fushatat e ndërmarra nga bankat për të gjeneruar kërkesë të shtuar për kredi nga individët
Në të njëjtën kohë bankat kanë lehtësuar standartet e kreditimit për individët në tremujorin e tretë të vitit 2020. Lehtësimi i standardeve u aplikua si për kreditë konsumatore, ashtu edhe për ato në blerjen e banesave.
Në tremujorin e fundit të vitit, bankat presin t’i lehtësojnë më tej standardet e kreditimit për individët, kryesisht në kreditë konsumatore.
Sipas raportit, satandardet e kreditimit për individët u lehtësuan kryesisht nga treguesit e lidhur me perceptimin për rrezikun nga ana e bankave, të tilla si: rreziku më i ulët nga kolaterali; aftësia paguese e kredimarrësit; si edhe zhvillimet aktuale e të pritura në tregun e banesave. Po ashtu, bankat thonë se treguan një tolerancë disi më të lartë ndaj rrezikut për kreditë dhënë individëve këtë tremujor. Faktorët e tjerë u raportuan të pandryshuar nga një tremujor më parë.
Po ashtu, raporti tregon se kushtet dhe termat e përgjithshëm për kreditë dhënë individëve u lehtësuan në tremujorin e tretë të vitit 2020.
Bankat kanë përmendur gjatë vrojtimit si faktor me ndikim negativ në kushtet e termat e kreditimit kategoritë e rrezikuara të individëve nga një mbyllje e mundshme e dytë për të frenuar përhapjen e Covid-19.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
