Një nga muzetë më të famshëm në Berlin do të mbyllet pjesërisht deri në vitin 2037

Nga Gazeta Si - Muzeu i Pergamonit, një nga muzetë më të famshëm të Berlinit, si dhe një nga më të rëndësishmit në botë në mesin e atyre që strehon gjetjet arkeologjike, ka njoftuar se do të mbyllet më 23 tetor të këtij viti për rinovime urgjente. Një pjesë e muzeut duhet të rihapet pas katër vitesh, në vitin 2027, por disa gazeta gjermane kanë vlerësuar se Muzeu i Pergamonit do të rihapet plotësisht vetëm në vitin 2037, pra pas 14 vitesh.

Është jashtëzakonisht e rrallë që një muze kaq i rëndësishëm të mbetet i mbyllur për kaq gjatë. Rinovimet priten prej disa kohësh dhe menaxhmenti i muzeut ka treguar disa herë në të kaluarën se sa komplekse dhe delikate janë ato, por njoftimi megjithatë ka marrë disa kritika. Gazeta konservatore “Die Welt”, për shembull, e quajti atë “një dështim të shkaktuar nga planifikimi i dobët”.

Muzeu i Pergamonit ia detyron emrin e tij të ashtuquajturit Altar i Pergamonit: një strukturë me portik që ishte pjesë e një tempulli kushtuar perëndisë Zeus, i ndërtuar në shekullin e dytë para Krishtit në Pergamon, në Turqinë lindore të sotme.

Dhoma ku ndodhet altari është tashmë e mbyllur që nga viti 2014 për rinovime që përfshijnë çatinë, sistemin e ngrohjes dhe dritaret: altari dhe statujat e tij janë aq delikate sa nuk mund të lëvizen, kështu që janë mbuluar që atëherë me çarçafë dhe skela.

Rinovimi i sallës së altarit duhej të përfundonte në vitin 2019, por pati disa vonesa dhe tani muzeu pret që salla dhe i gjithë krahu përreth, ai verior, të jetë i pari që do të rihapet në vitin 2027.

Disa skulptura në anën perëndimore të altarit: ato përfaqësojnë një betejë midis perëndive të Olimpit dhe disa qenieve monstruoze të quajtura "gjigantë"

Ndërkohë, krahu jugor i Muzeut të Pergamonit do të rihapet vetëm në vitin 2037, ai që strehon, për shembull, një koleksion gjigant prej 270 mijë pjesësh nga Lindja e Mesme: mbi të gjitha një rindërtim i pjesshëm i portës së Ishtarit, një nga portat hyrëse në qytetin e vjetër të Babilonisë. Ajo ishte ndërtuar në shekullin e 6-të para Krishtit dhe gërmuar nga një arkeolog gjerman në fillim të shekullit të njëzetë.

Muzeu i Pergamonit ka thënë se në vitet e ardhshme, një pjesë e vogël e koleksionit të tij do të ekspozohet në një godinë më të re të muzeut, të quajtur Panorama, ndërsa vepra të tjera do t’u huazohen muzeve në mbarë botën. Është vlerësuar se rinovimi i përgjithshëm i Muzeut të Pergamonit do të kushtojë rreth 1.5 miliardë euro. Ndër të tjera, do të ndërtohet edhe një krah i ri, i cili do ta lidhë atë më mirë me muzetë e tjerë të zonës përreth, si pjesë e një plani për rritjen e muzeve të qendrës së qytetit.

Që nga vitet 1990, Turqia është përpjekur të ushtrojë presion mbi Gjermaninë për të rikthyer disa ekspozita të vendosura në Muzeun e Pergamonit, duke përfshirë altarin e famshëm. Deri më tani, Gjermania është përgjigjur gjithmonë se në atë kohë i blinte rregullisht nga Perandoria Osmane, e cila përfshinte edhe Turqinë dhe tokat ku ndodhen ende gërmimet arkeologjike të Pergamonit të lashtë. /Il Post/

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.