.png)
Një restorant në Madrid i njohur për tortijat me vezë është mbyllur përkohësisht pas një shpërthimi të salmonelës, duke shkaktuar një debat mbi mënyrën sesi duhet të gatuhet pjata ikonike spanjolle dhe sa e lëngshme duhet të jetë.
Pjata zakonisht përmban një përzierje të patateve të skuqura dhe vezë, shpesh me qepë, dhe është një nga ushqimet më të konsumuara në Spanjë. Restoranti Casa Dani është i njohur për gatimin e lehtë të vezëve, duke shërbyer një version të lëngshëm.
Restoranti u mbyll përkohësisht pasi të paktën 59 persona u ankuan për helmim nga ushqimi, pasi kishin ngrënë tortilla atje javën e kaluar. Gjashtë janë shtruar në spital, sipas departamentit shëndetësor të rajonit të Madridit.
Casa Dani thotë se po bashkëpunon me autoritetet lokale shëndetësore për të siguruar që kuzhinat e saj të jenë pa salmonela dhe mund të hapen sërish së shpejti.
Restoranti ka fituar një sërë çmimesh, duke përfshirë kampionatin spanjoll të tortijës në 2019, dhe është paraqitur në serialin e Netflix Somebody Feed Phil. Ai shërben rreth 100,000 tortija çdo vit.
Rasti ka vënë nën shqyrtim mënyrën se si restorantet e përgatisin këtë pjatë dhe rregulloret për gatimin e vezëve.
Për tre dekadat e fundit, udhëzimet e qeverisë kanë qenë që vezët e shërbyera për publikun ose duhet të pasterizohen ose, nëse janë të freskëta, të gatuhen në një temperaturë prej të paktën 75 gradë Celsius.
Në dhjetor 2022, një dekret i qeverisë i liroi pak ato rregulla, duke deklaruar se vezët e freskëta duhet të gatuhen në 70 gradë C ose më shumë për dy sekonda ose në një temperaturë prej 63 gradë C për 20 sekonda.
Këto temperatura janë të rëndësishme pasi e bardha e vezës vendoset në rreth 62-65 gradë C dhe e verdha e vezës në 65-70 gradë C.
"Ne vendosim një termometër në tortija dhe e lëmë të gatuhet në 70 gradë për rreth dy minuta dhe kjo vret të gjitha bakteret", thotë Alfredo García, pronar i restorantit Sylkar në Madrid, i specializuar për të gatuar tortija.
María del Toro, e Qendrës La Rioja për Kërkime Biomjekësore (CIBIR), tha se “ne të gjithëve na pëlqen një tortija e lëngshme por ajo ka më shumë rrezik, veçanërisht për fëmijët, gratë shtatzëna dhe të moshuarit".
Zyrtarët e Madridit kanë thënë gjithashtu se në verë ka shumë rrezik për përhapjen e salmonelën në tortija.
“Kjo ndodh kur përdoren vezë të freskëta dhe tortija e gatuar lihet në temperaturën e dhomës për më shumë se dy orë para se të konsumohet”, thuhet në njoftimin e bashkisë së Madridit.
Në udhëzim këshillohet që të mos pastroni vezët përpara se t'i vendosni në frigorifer dhe të mos thyeni vezët në pjatën e përdorur më parë për përgatitjen e tortijas, për përgatitjen e tyre, për të shmangur kontaminimin.
Ato gjithashtu këshillojnë përdorimin e vezëve të pasterizuara, në krahasim me vezët e freskëta, nëse bëni një tortija të lëngshme.
“Megjithatë, 90% e klientëve në restorantin Sylkar preferojnë një tortija të lëngshme me vezë të freskëta”, thotë García, megjithëse ai pranon se rasti Casa Dani ka shtyrë shumë të kërkojnë që veza të gatuhet më shumë se normalja ditët e fundit.
Por ai thekson se preferencat në lidhje me likuiditetin e tortijas ndikohen edhe nga gjeografia.
“Në jug të Madridit, njerëzit i preferojnë ato shumë më të gatuara”, thotë ai.
"Në Andaluzi, tortijat janë si ‘tulla’. Në Spanjën veriore, tortijat priren të jenë shumë më pak të gatuara, shumë më të lëngshme".
Tortija ka qenë prej kohësh një fushë beteje për shijet e ndryshme për një çështje tjetër: nëse duhet gatuar apo jo me qepë.
“Nëse jeni një nga ata që përdorni qepë, fikeni që tani sobën”, paralajmëroi Dani García, pronar i Casa Dani, në një video gatimi të fundit.
Por shefi veteran i TV Karlos Arguiñano ka një pikëpamje tjetër.
“Tortija pa qepë është kampion i Europës”, tha ai së fundmi. “Por tortija me qepë është kampion i botës”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
