.png)
Nëse ndiheni të vetmuar, nuk jeni vetëm! Gati 1 në 4 të rritur në mbarë botën kanë raportuar se ndihen shumë ose mjaft të vetmuar, sipas një sondazhi të ri të Gallup.
Sondazhi, i kryer në 142 vende, zbuloi se 24% e njerëzve të moshës 15 vjeç e lart raportuan se ndiheshin shumë ose mjaft të vetmuar në përgjigje të pyetjes, "Sa i vetmuar ndiheni?"
Sondazhi zbuloi gjithashtu se shkalla e vetmisë ishte më e lartë tek të rinjtë, me 27% të të rinjve të moshës 19 deri në 29 vjeç që raportuan se ndiheshin shumë ose mjaft të vetmuar. Normat më të ulëta u gjetën tek të moshuarit. Vetëm 17% e njerëzve të moshës 65 vjeç e lart raportuan se ndiheshin të vetmuar.
Mbi gjysma e të rriturve të moshës 45 vjeç e lart raportuan se nuk ndjeheshin fare të vetmuar, ndërsa shumica e atyre më të rinj se 45 u përgjigjën se ndiheshin të paktën pak të vetmuar, nëse jo shumë ose mjaft të vetmuar.
“Ka shumë kërkime që tregojnë për rreziqet e vetmisë dhe izolimit social midis të moshuarve”, thotë Ellyn Maese, konsulente kërkimore në Gallup, duke shtuar se ky sondazh është një kujtesë se ve4tmia nuk është vetëm një problem i plakjes, por është një problem që mund të prekë këdo, në çdo moshë.
Ekziston një epidemi e vetmisë
Rreth 1000 njerëz për çdo vend u anketuan nga qershori 2022 deri në shkurt 2023, përmes një interviste me telefonata dhe ballë për ballë. Vendet përfaqësojnë rreth 77% të popullsisë së rritur të botës, sipas sondazhit.
Sondazhi gjithashtu vuri në dukje një raport të dhjetorit 2020 nga Organizata Botërore e Shëndetësisë dhe një këshillë të një kirurgu amerikan që ka folur për rreziqet e vetmisë, duke përfshirë një ndikim negativ në shëndetin mendor dhe fizik që mund të çojë edhe në vdekshmëri të hershme.
Psikologu klinik Ami Rokach, i cili ka studiuar përvojën e vetmisë, beson se mund të ketë norma globale edhe më të larta të njerëzve që ndihen të vetmuar sesa raportohen, veçanërisht të rinjtë.
Rokach, i cili jep mësim në departamentin e psikologjisë në Universitetin York në Toronto, tha se të rinjtë përjetojnë më shumë pasiguri në shumë fusha të jetës, duke përfshirë "një jetë të trazuar dashurie, pasiguri për një profesion, rrugën në procesin e ndarjes nga prindërit e tyre etj”.
Prandaj, të rinjtë kanë më shumë gjasa të përjetojnë më shumë vetmi sesa të rriturit e moshuar që kanë ‘grumbulluar’ tashmë "mençurinë, miqtë, një familje që mund të jetë mbështetëse dhe një komunitet që kujdeset për ta”, tha ai.
Maese shpreson që sondazhi të nxisë kërkime të mëtejshme se si vetmia mund të ndryshojë sipas vendit, moshës dhe gjinisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
