.png)
Kriza që shkaktoi COVID-19 bëri që deficiti buxhetor i vendit të zgjerohej me 35.7 miliardë lekë në tremujorin e dytë, për të arritur një nivel prej 38.5 miliardë lekësh për gjysmën e parë të vitit.
Banka e Shqipërisë shpjegon se situata e rënduar gjatë periudhës së pandemisë, kërkoi edhe mobilizimin e instrumenteve jokonvencionale në financimin e deficitit, krahas atyre tradicionale. Kjo do të thotë që u shfytëzua edhe instrumenti i financimit të shpejtë, Rapid Financing Instrument (RFI), i mundësuar prej FMN-së, në shumën e rreth 22.2 miliardë lekëve (ose 174 milionë euro).
Huamarrja nga jashtë po ashtu u shtua edhe me emetimin e Eurobondit 7-vjeçar, prej 650 milionë eurosh, në qershor 2020.
Pra, zgjerimi i huamarrjes nga jashtë qe në një masë më të lartë sesa deficiti i krijuar për këtë periudhë kohore, që ka sjellë një tepricë të konsiderueshme likuiditeti të qeverisë, kryesisht në monedhë të huaj, prej rreth 90 miliardë lekësh.
Huamarrja në tregun e brendshëm u shtua me rreth 26.3 miliardë lekë në tremujorin e dytë. Ndryshe nga një tremujor më parë, kjo huamarrje u diversifikua krahas instrumenteve edhe në terma të monedhës. Në muajin prill, qeveria emetoi në tregun e brendshëm obligacione 2-vjeçare të denominuara në euro në shumën 100 milionë euro (12.4 miliardë lekë), pas maturimit të plotë të këtij instrumenti në gusht të vitit 2019.
Gjithashtu, ndryshe nga vitet e tjera, në financimin e deficitit, instrumentet afatshkurtra dominuan kundrejt atyre afatgjata. Shtesa në lekë e huamarrjes në bono thesari për tremujorin e dytë ishte 8.9 miliardë lekë, ndërkohë që në obligacione ishte rreth 5 miliardë lekë. Blerësit kryesorë të titujve të emetuar në tregun e brendshëm mbeten bankat tregtare.
Rreth 54% e shtesës së huamarrjes së brendshme në tremujorin e dytë kishte si kundërparti bankat tregtare. Individët vijojnë të mos shfaqin interes të lartë kundrejt investimit në titujt e qeverisë, duke pakësuar peshën që ata mbajnë në portofolin total të titujve nga një tremujor në tjetrin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
