.png)
Gazeta Si - Ajas Sulejmani pretendon se nuk kishte qëllim të largohej pas aksidentit të frikshëm rrugor te “Rruga e Kavajës”.
Ai ishte i traumatizuar dhe thotë se iu desh të dërgonte në spital vajzën e të tij në mitur, e cila ndodhej në sediljen e pasme.
39-vjeçari që përplasi mesditën e të dielës një çift bashkëshortësh dhe foshnjën e tyre, ka theksuar se edhe frenat nuk i kanë mbajtur.
“Kam qenë me shpejtësi rreth 40 km në orë dhe përpara semaforit sapo u bë i kuq, unë nisa të frenoj, por nuk më mbajtën frenat, - ka thënë ai. - Në lidhje me largimin nga vendi i aksidentit, deklaroj se nuk kam pasur qëllim të iki, por duke qenë se ishte edhe vajza ime e mitur, u largova bashkë me të, pasi ajo dhe unë ishim të traumatizuar nga ky aksident”.
Pretendime për të cilat Prokuroria është duke kryer verifikimet dhe pret të administrojë pamjet filmike që e dokumentojnë një gjë të tillë.
LEXO EDHE:
- 96 përqind e të hetuarve për aksidente janë meshkuj. Ekspertët: Problemi nuk zgjidhet me gjoba
- Gjobiten qindra drejtues automjetesh për shkelje të rregullave në rrugë (Video)
- Përplasi këmbësoret në stacionin e autobusit, kërkohen 6 vite burg për shoferen
Prokurorja Elfrida Bregova, pritet të kërkojë arrest me burg për Sulejmanin për tre akuza: atë shkeljes së rregullave të qarkullimit me pasojë, drejtim të automjeteve në mënyrë të parregullt nën ndikimin e drogës dhe largim nga vendi i aksidentit.
Për shkak se në këtë aksident u rrezikua jeta e një të mituri, dosja do të përfaqësohet nga një prokuror për të miturit.
Pas rreth dy orësh është e bërë mundur kapja e drejtuesit të automjetit, që u gjet tek një spital privat.
Nga testi i “Dragerit” doli se ai nuk kishte pirë alkool, por nga testi i drogës, rezultoi se ishte nën ndikimin e lëndëve narkotike.
Sulejmani është justifikuar se merrte disa substance me qëllim rritjen e masës muskulore pasi merrej me palestër.
Pas aksidentit, 39-vjeçari u gjobit me 1 milionë lekë të vjetra dhe u vendos që leja e drejtimit t’i pezullohet për dy vjet.
Mirëpo një gjë e tillë nuk është pranuar nga ai, pasi ka shpreur qëndrim kundërshtues për masën e policisë.
Çifti, së bashku me foshnjën e tyre po kalonin në vijat e bardha në afërsi të “Rrrugës së Kavajës” më 8 maj.
Me shpejtësi dhe me të kuqe, Ajas Sulejmani shkakton aksidentin dhe braktisi aty mjetin luksoz me targa gjermane, duke u larguar menjëherë.
Bashkëshortët A.K., 48 vjeç, V.K., 43 vjeçe, dhe foshnja e tyre 3-muajshe, ndodhen jashtë rrezikut për jetën.
Pas analizave në spital, ka rezultuar se kryefamiljari ka fraktura në trup, ndërsa e shoqja ka pësuar hemorragji të brendshme.
Fatmirësisht foshnja e tyre ka shpëtuar pa dëmtime me përjashtim të një gërvishtjeje në faqe.
Mësohet se Gjykata e Tiranës ka shtyrë për të mërkurën vendimin për masën e sigurisë ndaj Sulejmanit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
