Spiropali vendos Tom Doshin si parti opozitare, PD: Elisa në ‘Botën e Çmendurirave’. Manipulim zgjedhor

Nga Gazeta ‘Si’- Sekretari për Çështjet Ligjore në Partinë Demokratike, Ivi Kaso, e cilëson një skandal tentativën e kryeparlamentares Elisa Spiropali, për ta vendosur partinë e Tom Doshit si parti opozitare, në krah të Sali Berishës.

Në një deklaratë për mediat nga selia blu, Kaso tha se Spiropali duke e paraqitur Partinë Social-Demokrate, të aleatit kryesor të Edi Ramës, Tom Doshi, jo si formacion të koalicionit qeverisës, por atij opozitar, ka cenuar rëndë të vërtetën.

Qëllimi, sipas tij, është për të grabitur një numërues të opozitës në zgjedhjet e ardhshme dhe për t’ia kaluar Doshit, i cili do të hiqet si parti e opozitës, “por do të militojë, numërojë e zhvasë për llogari të mazhorancës e NarkoRamës.”

“Elisa që e nisi në botën e Çudirave, me pretendimin se do shpëtonte dynjanë, ka kaluar tani në Botën e Çmendurirave. Sipas një plani të parapërgatitur për të manipuluar që në zanafillë, me çdo mjet dhe mënyrë zgjedhjet e 11 majit, në shkelje të plotë të ligjit dhe me skuthëri politike, ajo, duke përdhosur rolin e kryeparlamentares, e ka vendsour partinë e Tom Doshit në krah të opozitës së Sali Berishës.

Në një përgjigje që i ka kthyer intersimit të KQZ për rreshtimin e partive në Kuvend, kryetarja e Parlamentit, që me këtë mund të quhet e sharlamentit, e paraqet Partinë Social-Demokrate, të aleatit kryesor të Edi Ramës, heroit të zgjedhjeve të lira, Tom Doshi, jo si formacion të koalicionit qeverisës, por atij opozitar. Ky është një cënim i rëndë i së vërtetës, moralit politik dhe qytetar dhe shkelje me të dyja këmbët e barazisë në zgjedhje.

Qytetarët e dinë se me kë është rreshtuar Tom Doshi që nga Tirana dhe deri në Shkodër, që nga 2011-a e deri në 2025-ën. Analistët mund të hapin dokumentacion online të KQZ dhe të shohin se, edhe në letra, aleanca Rama-Doshi është e fiksuar”, tha Kaso.

Ai shtoi se sipas tij, Spiropali e bën këtë për të cënuar zgjedhjet e 11 majit, dhe për të ndihmuar Partinë Socialiste.

“Pse e bën gjithë këtë?

Qëllimi është për të grabitur një numërues të opozitës në zgjedhjet e ardhshme dhe për t’ja kaluar Doshit, i cili do të hiqet si e parti e opozitës, por do të militojë, numërojë e zhvasë për mazhorancën e NarkoRamës.

Ky falsifikim bie ndesh me dhjetra vendime të KQZ dhe Kolegjit Zgjedhor, të cilët përcaktojnë se opozitë nuk të bën vetëdeklarimi, por mbështetja që i jep në Kuvend nismave të qeverisë.
Këtë skandal opozita nuk ka për ta lejuar”, deklaroi Kaso ndërsa paralajmëroi Spiropalin se, po nuk u tërhoq vetë, do paditet në SPAK për abuzim dhe shpërdorim me detyrën si dhe falsifikim.

“Partia Demokratike e dënon ashpër këtë akt hajdutërie që dëmton balancat mes palëve në një vend ku të gjitha pushtetet janë në kthetrat e Ramës dhe mjaullimat e elisave të oborrit. Sa për Tomën, si hero të opozitarizmit, kundër Ramës në zgjedhje, edhe çakejtë maleve qeshin kur e dëgjojnë”, shtoi ai.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.