.png)
Nga Gazeta ‘Si’ – Ndërsa janë bërë 72 orë që nga nisja e regjistrimit të emigrantëve në zgjedhjet e 11 majit, të dhënat e Komisionit Qendror të Zgjedhjeve tregojnë se deri tani janë bërë 12 571 aplikime.
Nga aplikimet e bëra, 1 863 kërkesa janë miratuar ndërsa 10 321 janë ende nën shqyrtim. Ndërkohë, sipas të dhënave të KQZ, janë refuzuar 289 aplikime.
Siç shihet nga tabelat, në aplikime dominojnë me 69.9% burrat (përkatësisht 8 789 kërkesa në total) ndërsa femrat me 30.1% (3 782 kërkesa).
Ndërsa sipas grupmoshave, kërkesat më të mëdha janë bërë nga 26-35 vjeçarët me 31.2% (3 917) ndjekur nga grupmosha 36-45 vjeç me 27.4% (3.450 kërkesa).
Në seksionin e KQZ ku paraqiten kërkesat sipas bashkive, vihet re që aplikimet më të mëdha janë në bashkinë Tiranë me 19.6%, e cila ndiqet nga bashkia e Fierit me 8.6%, nga ajo e Durrësit me 5.2% dhe Shkodra me 4.2%.
Tre bashkitë me për qindjet më të vogla të aplikimeve janë ajo e Pustecit, Finiqit dhe Dropullit, përkatësisht me 0.1% secila.
Ndërsa sipas shteteve, kërkesat më të mëdha janë bërë nga Italia dhe Greqia me 29.9% dhe 19.9%, dy shtetet ku ka edhe më shumë shqiptarë.
(Në një mbledhje me drejtuesit politikë, kreu i PS Edi Rama lajmëroi më herët se në momentin e nisjes së regjistrimit të emigrantëve, do të dërgonte si në Itali ashtu edhe në Greqi disa drejtues politikë).
Gjithashtu vihet re një rritje kërkesash edhe nga Gjermania, SHBA-ja, Mbretëria e Bashkuar dhe Franca.
Në seksionin e KQZ që tregon për regjistrimet sipas shteteve, bien në sy edhe kërkesa nga shtete si: Afganistani, Angola, Kuvajti, Filipinet, Zambia, Guadalupe apo Zelanda e Re.
Megjithatë, kërkesat në këto shtete kanë qenë minimaliste, tipikisht nga një aplikim. Aplikimet mbyllen në datën 12 mars 2025.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
