.png)
Gazeta Si – Shqipëria ka një deficit të lehtë në sigurinë e të dhënave në raport me nivelin e ofrimit të atyre që njihen si e-Shërbime.
Sipas Indeksit Kombëtar të Sigurisë Kibernetike, një projekt i akademisë estoneze për e-Qeverisjen, niveli i sigurisë së shërbimeve elektronike të ofruara nga qeverisja në Shqipëria përllogaritet në 48.05 pikë, ndërsa niveli i zhvillimit të shërbimeve digjitale është 48.74 pikë
Diferenca prej -0.69 për qind mes këtyre dy shifrave do të thotë se zhvillimi dhe përhapja e shërbimeve digjitale në vendin tonë nuk kanë ecur paralelisht me sigurinë e tyre, duke prodhuar këtë deficit të lehtë.
Ndërkohë, vendi më i sigurtë në mbrojtjen e të dhënave të qytetarëve vlerësohet Greqia me një diferencë prej +31 pikë. Në indeksin e sigurisë kibernetike, Greqia renditet e para me 96.1 për qind, ndërsa nivelin e zhvillimit digjital e ka 64.47 pikë.
Sipas akademisë estoneze, Greqia ka këtë nivel të lartë sigurie për faktin se e ka nisur procesin e digjitalizimit shumë më vonë se vendet e tjera, çka i dha mundësi që të mësonte aty ku të tjerët gabuan në çështjet e sigurisë. Greqia aplikon thuajse në të gjithë sistemet e saj teknologjinë e sigurisë “blockchain”, që Shqipëria, sipas deklaratave të bërë nga Kryeministri Edi Rama do të fillojë ta aplikojë në sistemet e veta.
Lista e dhjetë vendeve të para përsa i takon sigurisë kibernetike vijon me Lituaninë, Belgjikën, Çekinë, Estoninë, Gjermaninë, Portugalinë, Spanjën dhe Poloninë. Sa i takon nivelit të përhapjes së shërbimeve digjitale, Gjermania renditet e para me 81.43 pikë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
