.png)
Ajo ka më shumë se 130,000 ndjekës në Instagram, ku poston foto nga aventurat e saj në mbarë botën. Grimi i saj është gjithmonë i patëmetë, rrobat e saj duken perfekt. Ajo këndon, kërcen dhe modelon dhe asnjëra prej këtyre nuk është reale.
Rozy është një "influencuese virtuale" e Koresë së Jugut e cila shpesh cilësohet si njeri i vërtetë kur nuk është aspak e tillë.
Sipas kompanisë në Seul që e krijoi atë, Rozy është një përzierje e një personi, një AI dhe një robot që ndahen në botën reale dhe virtuale.
Ajo është "në gjendje të bëjë gjithçka që njerëzit nuk mund të bëjnë, në formën më njerëzore", thotë Sidus Studio X në faqen e saj të internetit.
Kjo përfshin fitimet për kompaninë në botën e reklamave me miliarda dollarë.
Që nga fillimi i saj në vitin 2020, Rozy ka arritur marrëveshje dhe sponsorizime të markave, ka dalë në pistë në shfaqjet virtuale të modës dhe madje ka publikuar dy këngë.
Dhe ajo nuk është vetëm.
Industria "virtuale njerëzore" po lulëzon, dhe bashkë me të një ekonomi krejtësisht e re në të cilën influencuesit e së ardhmes nuk plaken kurrë, nuk bëjnë kurrë skandale dhe janë dixhitalisht të përsosur.
Si funksionojnë influencuesit virtualë
Teknologjia CGI (imazhe të gjeneruara nga kompjuteri) pas Rozy nuk është e re. Është e kudondodhur në industrinë e sotme të argëtimit, ku artistët e përdorin atë për të krijuar personazhe realiste jo-njerëzore në filma, lojëra kompjuterike dhe video muzikore.
Por vetëm kohët e fundit është përdorur për të bërë influencues.
Ndonjëherë, Sidus Studio X krijon një imazh të Rozy nga koka te këmbët duke përdorur teknologjinë, një qasje që funksionon mirë për imazhet e saj në Instagram. Herë të tjera ajo vendos kokën e saj mbi trupin e një modeleje njerëzore për shembull.
Marka e shitjes me pakicë të Koresë së Jugut Lotte Home Shopping krijoi influencuesen e saj virtuale të quajtur Lucy, e cila ka 78,000 ndjekës në Instagram.
Ashtu si homologët e tyre në jetën reale, influencuesit virtualë krijojnë ndjekës përmes mediave sociale, ku postojnë fotografi të "jetës" së tyre dhe ndërveprojnë me fansat e tyre. Llogaria e Rozy tregon se ajo "udhëton" në Singapor dhe shijon një gotë verë në një çati, ndërsa fansat e saj komplimentojnë veshjet e saj.
Brezat e vjetër mund ta konsiderojnë disi të çuditshme ndërveprimin me një person artificial. Por ekspertët thonë se influencuesit virtualë kanë zënë një vend të rëndësishëm në rrjetet sociale.
Lee Na-kyoung, një 23-vjeçare që jeton në Incheon, filloi të ndiqte Rozy rreth dy vjet më parë duke menduar se ajo ishte një person i vërtetë.
Rozy e ndoqi atë, ndonjëherë duke komentuar postimet e saj dhe një miqësi virtuale lulëzoi, një miqësi që ka mbijetuar edhe pasi Lee zbuloi të vërtetën.
"Ne komunikuam si mikesha dhe u ndjeva rehat me të kështu që nuk e mendoj si një AI, por një mikeshë të vërtetë", tha Lee.
"Më pëlqen përmbajtja e Rozy", shtoi Lee. “Ajo është aq e bukur sa nuk mund ta besoj se është një AI”.
Një biznes fitimprurës
Instagrami i Rozy-t është i mbushur me përmbajtje të sponsorizuar ku ajo reklamon produkte për kujdesin e lëkurës dhe modës.
"Shumë kompani të mëdha në Kore duan të përdorin Rozy si modele", tha Baik Seung-yup, CEO i Sidus Studio X.
"Këtë vit, ne presim të arrijmë lehtësisht rreth 1.52 milion dollarë në fitim, vetëm me Rozy".
Ai shtoi se ndërsa Rozy u bë më e njohur, kompania fitoi më shumë sponsorizime nga markat luksoze si Chanel dhe Hermes, si dhe revista dhe kompani të tjera mediatike. Reklamat e saj tani janë shfaqur në televizion, madje edhe në hapësirat si tabelat dhe anët e autobusëve.
Edhe kompania Lotte Home Shopping pret fitime të ngjashme këtë vit nga Lucy, e cila ka sjellë oferta reklamimi nga kompanitë financiare dhe ndërtimore, sipas Lee Bo-hyun, drejtori i Lotte Home Shopping.
Modelet janë shumë të kërkuara sepse ndihmojnë markat të arrijnë konsumatorët më të rinj, thonë ekspertët. Klientët e Rozy përfshijnë një firmë sigurimesh jete dhe një bankë, kompani që zakonisht shihen si të modës së vjetër.
Lotte dhe Sidus Studio X u duhen disa orë deri në disa ditë për të krijuar një imazh të yjeve të tyre dhe nga dy ditë në disa javë për një reklamë video. Kjo është shumë më pak kohë dhe punë sesa kërkohet për të prodhuar një reklamë me njerëz të vërtetë ku javë ose muaj mund të shpenzohen për kërkimin e vendndodhjes dhe përgatitjen e logjistikës si ndriçimi, flokët dhe grimi, stilimi, ushqimi dhe redaktimi pas prodhimit.
Lotte Home Shopping punëson njerëz për të reklamuar produktet në TV por ato "kushtojnë shumë" dhe "do të ketë ndryshime kur të plaken", tha Lee. Kështu, ata krijuan Lucy, e cila është "gjithmonë 29 vjeç".
Koreja e Jugut nuk është i vetmi vend që ka përqafuar influencuesit virtualë.
Ndër ndikueset virtuale më të famshme në botë janë Lil Miquela, krijuar nga bashkëthemeluesit e një startup-i teknologjik amerikan, i cili ka bashkëpunuar me marka duke përfshirë Calvin Klein dhe Prada dhe ka më shumë se 3 milionë ndjekës në Instagram. Lu of Magalu, krijuar nga një kompani braziliane, me afro 6 milionë ndjekës në Instagram dhe FNMeka, një reper i krijuar nga kompania muzikore Factory New, me më shumë se 10 milionë ndjekës të TikTok.
Por ka një ndryshim të madh, sipas Lee Eun-hee, profesor në Departamentin e Shkencës së Konsumatorit të Universitetit Inha: influencuesit virtualë në vende të tjera priren të pasqyrojnë një shumëllojshmëri të prejardhjeve etnike dhe idealeve të bukurisë.
“Njerëzit virtualë kudo kanë një standard që nuk e ndryshojnë ndërsa ato në Kore janë bërë gjithmonë më të bukur duke reflektuar vlerat e çdo vendi", shtoi Eun-hee.
Dhe në Korenë e Jugut, quajtur shpesh "kryeqyteti i kirurgjisë plastike në botë" ka shqetësime se influencuesit virtualë mund të nxisin më tej standardet joreale të bukurisë.
Lee Eun-hee paralajmëroi se influencueset virtuale si Rozy dhe Lucy mund t'i bëjnë standardet tashmë të kërkuara të bukurisë së Koresë edhe më të paarritshme dhe mund të rrisin kërkesën për kirurgji plastike ose produkte kozmetike tek gratë që kërkojnë t'i imitojnë ato.
Por shqetësimet shkojnë përtej standardeve koreane të bukurisë. Në botë ka debat mbi etikën e marketingut të produkteve për konsumatorët të cilët nuk e kuptojnë se modelet nuk janë njerëzore, si dhe rrezikun e përvetësimit kulturor kur krijohen influencues të etnive të ndryshme.
Kompania mëmë e Facebook dhe Instagram, Meta, e cila ka më shumë se 200 influencues virtualë në platformat e saj, i ka pranuar rreziqet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
