Lajme

Vizitë surprizë e Trump në Irak, bashkë me të edhe Melania

Presidenti amerikan Donald Trump dhe “Zonja e Parë” Melania, kanë mbërritur në Irak për një vizitë surprizë për trupat amerikane të dislokuara atje. Lajmi bëhet i ditur nga zëdhënësja e Shtëpisë së Bardhë, Sarah Huckabee Sanders në një ‘tweet’.

Sipas asaj që shkruajnë mediat amerikane, Trump ka nënvizzuar që “nuk ka asnjë plan” për tërheqjen e trupave amerikaane nga Iraku, ndryshe nga ç’pati deklaruar pak ditë më parë, ku forcat amerikane do të tërhiqen gradualisht nga Afganistani dhe Siria. Kjo është vizita e parë e Trump në Irak që kur ka ardhur në krye të Shtëpisë së Bardhë.

Presidenti dhe Zonja e Parë, Melania, vizituan fillimisht bazën ajrore Al-Assad në Irak, ku u takuan me ushtarët.

Vizita, e mbajtur e fshehtë me mjaft kujdes, vjen ndërkohë që qeveria federale amerikane është në mbyllje të pjesshme. Ajo vjen gjithashtu më pak se një javë pasi zoti Trump njoftoi planet për tërheqjen e trupave nga Siria dhe rreth gjysmës së atyre në Afganistan, duke zemëruar madje disa nga aleatët e tij më të vendosur politikë.

Vendimi që ai mori për Sirinë, megjithë kundërshtimet e gjeneralëve dhe këshilltarëve civilë amerikanë, çoi në dorëheqjen e sekretarit të mbrojtjes Jim Mattis.

Vendi që Trump zgjodhi për të vizituar është skenë ku ai nuk ka premtuar një tërheqje të shpejtë të forcave. Iraku është gjithashtu vendi ku ai thotë se ka arritur fitoren e tij më të madhe ushtarake, humbjen e Shtetit Islamik në Mosul, qytetin irakian ku udhëheqësi i grupit, Abu Bakr al-Baghdadi deklaroi fillimin e të ashtuquajturit kalifat.

Sulmi ndaj Mosulit nga forcat irakiane, mbështetur nga amerikanët, filloi në kohën e Presidentit Barak Obama, por arriti kulmin në verën e vitit 2017 nën zotin Trump.




Futboll

Lind UEL2, si do të funksionojë kupa e 3-të e UEFA-s për klube!

Në pritje të një emërtimi më të saktë, mund të thuhet tashmë se ka lindur UEL2, UEFA Europa League 2. Në fillim të dhjetorit, UEFA ka bërë të ditur lajmin se do të organizohet një komptecion i tretë për klubet. Një kompeticion që do të startojë në vitin 2021 dhe që tashmë e ka marrë miratimin e organizatës që drejton futbollin europian.

Bëhet fjalë për një kompeticion që do t’i bashkohet Champions League dhe Europa League. U ngjan atyre edhe si strukturë, më shumë i ngjan Europa League, sepse edhe ndeshjet është menduar të zhvillohen ditën e enjte, prej orës 16:30.

Si do të funksionojë ky kompeticion? Në stilin e një Botërori klasik, me 32 skuadra të ndara në 8 grupe. Do të kalojnë direkt në turin tjetër vetëm skuadrat e para të çdo grupi, por para fazës së 1/8-ve do të jenë ndeshjet shtesë. Do të përballen skuadrat e vendeve të dyta në grupet e UEL2 me skuadrat e vendeve të treta në grupet e Europa Legue. Do të zhvillohen 141 ndeshje në 15 javë. Skuadra fituese fiton të drejtën për të marrë pjesë sezonin e ardhshëm në Europa League.

Organizimi i këtij kompeticioni të tretë europian mendohet se do të shtojë të ardhurat për klubet. UEFA do të bëjë të ditura me kalimin e kohës detaje të tjera të këtij kompeticioni.




Lajme

Kënaqësia për të dhuruar, zgjat më shumë se ajo për të marrë

Të shohësh buzëqeshjen në fytyrën e një personi, ndërsa hap një pako dhe sytë që shkëlqejnë për mendimin që i është kushtuar atij. Për Krishtlindje, shkenca konfirmon atë që në realitet shumë njerëz dyshojnë: gëzimi i dhënies së një dhurate është më i madh sesa ai për të të marrë, që do të thotë zgjat më shumë.

Një hulumtim I University of Chicago Booth School of Business dhe i Northwestern University Kellogg School of Management, që do të publikohet në “Psychological Science”, nxjerr në pah se lumturia që përjetojmë pas një ngjarjeje ose aktiviteti të caktuar zvogëlohet sa herë që ne e përjetojmë atë, një fenomen i njohur si adaptim hedonik, por dhurata për të tjerët, mund të jetë përjashtim nga ky rregull.

Në një eksperiment, pjesëmarrësit, 96 studentë universiteti, morën 5 dollarë çdo ditë për 5 ditë me radhë, të cilat ata duhet të shpenzonin në të njëjtën kohë.

Studiuesit pyetën rastësisht pjesëmarrësit për të përdorur para për vete ose për dikë tjetër, për shembull duke lënë para në një kuti duke bërë një donacion online në të njëjtën organizatë bamirëse çdo ditë.

Të dhënat treguan një model të qartë: pjesëmarrësit filluan me nivele të ngjashme të lumturisë dhe ata që shpenzuan para për vete raportuan një rënie të vazhdueshme, gjë që nuk ndodhi për ata që i dhuruan dikujt tjetër. Gëzimi i dhënies për të pestën herë radhazi ishte po aq i fortë sa në fillim. Të dy studiuesit Ed O’Brien dhe Samantha Kassirer pastaj zhvilluan një eksperiment të dytë në internet, në të cilin 502 pjesëmarrës luajtëm në 10 raunde të lojës.

Ata fituan pesë cent për raundin, duke zgjedhur nëse do t’i mbanin ose do t’i jepnin paratë një organizate sipas zgjedhjes së tyre. Gjithashtu në këtë rast, doli se lumturia e atyre që dhuruan fitime u ul shumë më ngadalë.




Futboll

Roma ka shansin e fundit për të ndalur Juventusin

Në fillim Napoli, pastaj Milan dhe së fundmi edhe Inter, të gjitha Juventus i ka mposhtur duke marshuar i frikësuar drejt titullit të 8-të radhazi në Serinë A. Por në raundin e 17-të të kampionatit, torinezët kanë një provë të vështirë përpara. Në “Juventus Stadium” këtë të shtunë zbarkon Roma e Di Françeskos.

Romanët që nuk kanë bërë një kampionat të mirë deri në këto momente, kanë shansin e artë që të ndalin për herë të parë këtë Juventus dhe kështu kampionati mos të “vritet” përfundimisht për këtë edicion. Pas 16 javëve, Roma ka vetëm 24 pikë në renditje dhe i duhet një fitore me çdo kush nëse duan ende të mbajnë gjallë shpresat për zonën Champions. Por nga ana tjetër Juventus është në një moment të mirë dhe nuk kërkon që të ndalet në mënyrë që në në muajin mars në fazën finale të kompeticioneve të jetë më i qetë. Roma pret rikthimin e disa lojtarëve të rëndësishëm për këtë përballje, por edhe Juventus nuk vuan mungesa të rëndësishme dhe në fushën e lojës, Alegri do të hedhë formacionin më të mirë të mundshëm.

Përballja fillon që prej orës 20:30 dhe të gjithë tifozët e të dyja ekipeve do të kenë mundësinë ta ndjekin përmes platformës Digitalb në kanalin Supersport 2.