.png)
Gazeta Si - Policia spanjolle ka mundur të arrestojë 43-vjeçarin Marsel D. të premten në aeroportin e Valencias.
Sipas mediave lokale, autoritetet kishin informacione se një person i kërkuar nga Belgjika do të mbërrinte me një fluturim nga Shqipëria, raportojnë mediat belge.
Pas uljes, ai tentoi të kalonte kontrollin e pasaportës me dokumente false, por në bazë të shenjave të gishtave, u identifikua si Marsel D., i kërkuar për vrasjen e Bledar Muçës në 22 janar 2022 në Aartselaar të Anversës.
Nga verifikimi i thelluar në sistemin e kontrollit në aeroport, është zbuluar se ai ishte personi i kërkuar për krime të rënda, si përfshirja në organizatë kriminale, agresion dhe ndihma në vrasje.
Kontrolli i gjurmëve të gishtërinjve e ka tradhtuar 43-vjeçarin, që figuronte me kartelë të kuqe nga autoritetet belge.
Muça drejtonte aktivitetet e drogës të grupit të tij në Belgjikë dhe ishte i përfshirë në konflikte kriminale me grupe të ndryshme rivale prej një dekade.
Muça, 39 vjeç, i cilësuar si krahu i djathtë i fisit Çapja në Elbasan, u vra me gjakftohtësi mbrëmjen e së shtunës përpara banesës së tij në Baron Van Ertbornstraat në Aartselaar. Të paktën dy persona të armatosur e prisnin dhe e qëlluan për vdekje kur u kthye në shtëpi.
Ende nuk është i qartë roli i të arrestuarit Marsel D. në këtë vrasje. Sipas mediave spanjolle, ai mësohet se u ka dhënë vrasësve informacione për Muçën.
D. u fut në paraburgim në Spanjë në pritje të ekstradimit të tij të mundshëm drejt Belgjikës, e cila e kishte shpallur në kërkim.
Të paktën një i dyshuar në hetimin e vrasjes së Muçës është ende në burg në Belgjikë. Ky është një tjetër shqiptar, Sergej H., i cili u arrestua në pranverën e vitit 2022.
Një i afërm i tij, ishte dënuar tashmë në Shqipëri në vitin 2019 për një tentativë vrasjeje të Bledar Muçës dhe Florenc Çapjes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
