.png)
Nga Gazeta Si – Sëmundjet e gjakut të transmetueshme kryesisht nga nëna, si talasemia dhe hemofilia, mund të shmangen nëse prindërit pranojnë abortin, por megjithëse në Shqipëri ekziston baza ligjore për ndërprerjen e shtatzënisë, kjo nuk ndodh.
Sikurse talasemia, edhe për hemofilinë, një sëmundje më e rrallë gjenetike që transmetohet direkt nga nëna, në Shqipëri regjistrohen çdo vit raste të reja.
Mjeku hematolog në qendrën Kombëtare të Hemofilisë, QSUNT, Bledi Kalaja tha për Gazetasi.al se nevojiten më shumë fushata ndërgjegjësimi ndaj kësaj sëmundje, për një identifikim dhe diagnostikim sa më të hershëm, në mënyrë që ajo të mos bëhet kërcënuese për jetën.
“Qendra Kombëtare e Hemofilisë është e vendosur pranë Qendrës Spitalore Universitare “Nënë Tereza”. Ajo trajton pacientët me hemofili, si dhe me patologji të tjera të rralla të lindura të koagulimit të gjakut. Çdo pacient i regjistruar pranë Qendrës disponon të dhënat laboratorike, imazherike, konsultat e ndryshme si dhe ndjekjen periodike klinike në mënyrë të rregullt. Aktualisht pranë Qendrës Kombëtare të Hemofilisë janë të regjistruar rreth 253 pacientë me Hemofili nga të cilët 35 pacientë janë me Hemofilia B dhe 218 paciente me Hemofilia A (regjistrimi është në dinamikë)”, thotë hematologu Kalaja.
Sipas mjekut specialist, ka dhe raste kur çiftet e reja me një nënë e prekur nga hemofilia nuk pranojnë të abortojnë fëmijën ndonëse përqindja e lindjes së bebit me këtë diagnozë është e sigurt. Në këto raste, mjeku Kalaja thotë se specialistët janë të pafuqishëm të detyrojnë prindërit të marrin vendim.
“Është në dorën e tyre të vendosin por ne u themi për sëmundjen e gjakut me të cilën fëmija i tyre do të duhet të bashkëjetojë gjithë jetën”, shton hematologu Kalaja.
I pyetur për trajtimin e kësaj sëmundje, hematologu Bledi Kalaja shpjegon se vitet e fundit është përmirësuar situata e furnizimit me medikamente për këtë kategori pacientësh, ndryshe nga vitet e shkuara ku në mungesë kryesisht të faktorit 8, më i munguari ndër vite në QSUT.
Mjekët specialistë thonë se në Shqipëri pacientët hemofilikë janë të të gjitha moshave.
Ata këshillojnë që në rastet e gjakderdhjes duhet aplikuar ndihma e parë sa më shpejt të jetë e mundur për të kufizuar sasinë e gjakderdhjes dhe dëmtimin e mëtejshëm.
Sipas tyre kjo duhet bërë gjithmonë edhe nëse ata janë në mjekim me faktor.
Mjekët thonë se për të qëndruar të shëndetshëm, përveç trajtimit mjekësor, personat me hemofili duhet të ushtrojnë aktivitet fizik dhe të rrinë në formë, të veshin mbrojtës të përshtatshëm për sport apo aktivitet, të kryejnë kontrolle të rregullta mjekësore duke përfshirë dhe ekzaminimin e muskujve dhe artikulacioneve, të kryejnë të gjitha vaksinimet e rekomanduara duke përfshirë dhe mbrojtjen nga Hepatitit A dhe Hepatiti B si dhe të mbajnë një peshë trupi të shëndetshme.
Por çfarë duhet të dimë për Hemofilinë
Hemofilia është një çrregullim i koagulimit të gjakut. Shumë faktor koagulues që ndodhen në plazëm (produkt gjaku) punojnë së bashku për të formuar mpiksjen, pra ndalimin e gjakderdhjes. Tek njerëzit me hemofili mungon një nga faktorët që bën koagulimin (mpiksjen e gjakut), ose niveli i faktorit është i ulët. Kjo bën që gjaku të këtë vështirësi në mpiksje, kështu që gjakderdhja vazhdon më gjatë se zakonisht, jo më shpejt. Por a është hemofilia e njëjtë?
Mjekët thonë se personat me nivel të ulët të faktorit VIII kanë hemofili A.
Sipas tyre, personat me nivel të ulët të faktorit IX kanë hemofili B.
Hemofilia mund të jetë e formës së lehtë, të mesme ose të rëndë, kjo varet nga niveli i faktorit koagulues.
Personat qё vuajnё nga forma e rёndё e hemofilisё kanё hemoragji tё herё pas hershme nё muskuj dhe artikulacione. Hemoragjitё tek ata ndodhin njё apo dy herё nё javё dhe shpeshherё ёshtё spontane, pra pa njё shkak.
Personat me hemofili tё formёs sё mesme kanё episode tё hemoragjive spontane mё tё rralla, dhe zakonisht pas lёndimeve apo goditjeve.
Personat me hemofili tё formёs sё lehtё zakonisht pësojnë hemoragji vetёm gjatё traumave apo ndёrhyrjeve kirurgjikale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje