.png)
Gjykata Kushtetuese thotë se Kushtetuta nuk ja jep shprehimisht kompetencën për të vlerësuar vlefshmërinë në tërësi të proceseve zgjedhore vendore dhe në vendimin e arsyetuar.
“Kushtetutëbërësi nuk ka përdorur termin “funksionar”, edhe pse ai mund të përkojë me organin, sepse qëllimi i këtij neni është mbrojtja e organeve të qeverisjes vendore, të cilat ngrihen dhe funksionojnë sipas parimeve të decentralizimit të pushtetit dhe të autonomisë vendore. Kjo normë kushtetuese përcakton shprehimisht juridiksionin e Gjykatës për të kontrolluar shkarkimin e këtyre organeve, e cila përbën një lloj të veçantë të kontrollit kushtetues, që nuk u referohet rasteve të pazgjedhshmërisë apo papajtueshmërisë në ushtrimin e detyrës”, thotë Gjykata Kushtetuese.
Ndonëse nuk e shpreh drejtpërdrejtë, nënkupton se kjo kompetencë i është dhënë nga ligjvënësi Komisionit Qendror të Zgjedhjeve dhe Kolegjit Zgjedhor në Gjykatën e Apelit.
“Edhe Komisioni i Venecies është shprehur se ankimet zgjedhore kundër vendimeve të KQZ-së, ose mungesës së vendimmarrjes, shqyrtohen nga Kolegji Zgjedhor, i cili ka kompetencën për të kontrolluar ligjshmërinë e tyre dhe vihet në lëvizje me kërkesë të subjekteve që legjitimohen, çka do të thotë se në këto raste legjislacioni ka parashikuar mjete ligjore në dispozicion”, thuhet në vendim.
Kërkesa e dytë e kësaj shoqate lidhej me regjistrimin e partisë Bindja Demokratike, që sipas kërkesës u regjistrua në zgjedhje para se të regjistrohej në gjykatë si parti.
Edhe kërkesa e dytë është rrëzuar. Gjykata Kushtetuese vëren se çështja e regjistrimit të Bindjes Demokratike në zgjedhjet e 30 qershorit të 2019-s është më shumë një çështje e aspektit ligjor se sa kushtetues, prandaj nuk përfshihet në kompetencat e saj dhe se shoqatat nuk legjitimohen për ngritjen e këtyre kërkesave në Kushtetuese.
“Neni 9 i Kushtetutës ka parashikuar se cilat janë ato veprimtari të partive politike që ndalohen të ushtrohen. Ndërkohë që pretendimet e kërkueses kanë të bëjnë me procedurën e regjistrimit të partisë “Bindja Demokratike” dhe pjesëmarrjen e saj në zgjedhje, duke mos qenë e regjistruar sipas ligjit, të cilat në thelb janë pretendime me natyrë ligjore dhe jo kushtetuese”, thuhet në vendimin e arsyetuar.
Ajo që bie në sy është që vendimi i Gjykatës Kushtetuese për rrëzimin e të dyja kërkesave është unanim, ndërsa vetëm gjyqtarja Sonila Bejtja ka dhënë miratimin për këtë vendim me një mendim paralel nga gjashtë kolegët e tjerë të saj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
