.png)
Marash Kumbulla kishte rënë në sy që në fillim të kampionatit me aktivizimin si titullar te Verona, edhe pse është vetëm 19 vjeç, por goli i shënuar ndaj Sampdorias të shtunën e kaluar e ka vënë atë në qendër të vëmendjes. Shtypi italian e ka ngritur në qiell. Nuk ishte një gol i zakonshëm. Ishte një gol që e fut në histori mbrojtësin kuqezi, tashmë me një rekord ndërkombëtar. Shkodrani është i pari mbrojtës i lindur në 2000-shin që shënon në nivelin më të lartë të futbollit italian dhe gjithashtu në 5 kampionatet më të fortë të Europës, atë italian, spanjoll, anglez, gjerman dhe francez.
“La Gazzetta dello Sport” i ka kushtuar një artikull të plotë Kumbullës, rritjes së tij si futbollist dhe golit rekord. Ja çfarë shkruan gazeta prestigjioze italiane për 19-vjeçarin e Kombëtares shqiptare:
Një mur i lartë dhe i fortë përpara portës së Marko Silvestrit. Është ai i mbrojtjes së Veronës, e dyta më e mirë në Serinë A, pas asaj të Interit të Kontes, edhe pse emrat nuk janë nga më të njohurit. Rrahmani, Gunter dhe Kumbulla është treshja e prapavijës së Veronës, që në 7 ndeshje ka pësuar vetëm 5 gola. Mes ekspertit Gunter dhe zbulimit Rrahmani, spikat shqiptari Marash Kumbulla, i cili me golin e së shtunës ndaj Sampdorias ka vendosur një rekord historik: ai është mbrojtësi i parë i lindur në vitin 2000 që shënon në Serinë A.
I lindur në Peskiera del Garda, më 8 shkurt 2000, Kumbulla është rritur tek ekipet e moshave të Veronës, ku ka hyrë që 8 vjeç. Që në moshën 16-vjeçare stërvitej me të rinjtë dhe pak muaj më pas ishte element stabël i këtij ekipi. Në Angli, ata si Kumbulla quhen “local hero”. Ka lindur në Itali nga prindër shqiptarë, ka dy pasaporta, është një veronez i adoptuar. Vitin e kaluar u grumbullua vetëm për një ndeshje me ekipin e parë të Veronës në Serinë B, kurse këtë sezon ka vendosur rekord në Serinë A. Edhe trajneri Reja e ka grumbulluar me Shqipërinë për kualifikueset e Euro 2020, por ende nuk ia ka dhënë mundësinë e debutimit.
Me trajnerin Ivan Juriç, Kumbulla ka luajtur 5 ndeshje nga 7 që janë zhvilluar, ku impakti me nivelin më të lartë të futbollit italian nuk ka shkuar edhe aq mirë. Dy kartonë të verdhë në 4 javët e para dhe pastaj i kuqi në barazimin 0-0 me Udinezen. Kartonët e shumtë janë një problem për Veronën, në fakt, që pas Milanit, është skuadra e dytë më e ndëshkuar, me 12 kartonë të verdhë. Sigurisht, Kumbulla ka paguar mungesën e përvojës. Goli ndaj Sampdorias e ka futur në histori mbrojtësin shqiptar, me atë rekord ndërkombëtar. Ai është mbrojtësi i parë i datëlindjes 2000 që ka shënuar gol në 5 kampionatet më të fortë të Europës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
