.png)
Netflix po zgjeron aktivitetin në botën e futbollit, pasi ka siguruar të drejtat ekskluzive të transmetimit të Kupës së Botës 2030 për Spanjën dhe Andorrën.
Kjo shënon një hap të rëndësishëm për platformën, e cila për herë të parë do të transmetojë një kompeticion madhor ndërkombëtar të futbollit për meshkuj.
Sipas njoftimit të kompanisë, Netflix do të ofrojë transmetim të drejtpërdrejtë të të 104 ndeshjeve të turneut për audiencën në të dyja vendet.
Kupa e Botës 2030 do të shënojë 100-vjetorin e organizimit të kompeticionit. Spanja do të jetë një nga vendet pritëse, së bashku me Portugalinë dhe Marokun, ndërsa Argjentina, Paraguai dhe Uruguai do të presin disa ndeshje në kuadër të festimeve për këtë përvjetor.
Platforma ka bërë të ditur se mbulimi do të përfshijë programe para ndeshjeve, gjatë pushimit dhe pas përfundimit të tyre, si dhe një program të përditshëm me momentet më të rëndësishme të ditës dhe përmbajtje të tjera për të shoqëruar turneun.
Një pjesë e ndeshjeve do të jenë gjithashtu të disponueshme falas për publikun në Spanjë. Sipas marrëveshjes, një ndeshje për çdo ditë të aktivitetit do të transmetohet pa pagesë në Netflix, ndërsa një paketë ndeshjesh do t’i ofrohet edhe një rrjeti televiziv kombëtar falas. Kjo paketë do të përfshijë të gjitha ndeshjet e Spanjës, gjysmëfinalet dhe finalen.
Drejtoresha kryesore e përmbajtjes në Netflix, Bela Bajaria, u shpreh entuziaste për marrëveshjen, duke theksuar se Kupa e Botës është një ngjarje që bashkon njerëzit dhe krijon kujtime të veçanta për tifozët.
Edhe sekretari i përgjithshëm i FIFA-s, Mattias Grafström, e vlerësoi bashkëpunimin, duke nënvizuar synimin për ta afruar më shumë futbollin me tifozët në Spanjë dhe Andorrë.
Marrëveshja për Botërorin 2030 i shtohet portofolit të të drejtave sportive të Netflix, ku përfshihen edhe edicionet e viteve 2027 dhe 2031 të Kupës së Botës për Femra, si dhe kompeticione dhe evente të tjera sportive.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje