Ministri i Jashtëm në Detyrë, Gent Cakaj e cilësoi akt kriminal dhe të orkestruar nga drejtuesit e Partisë Demokratike dhe Lëvizjes Socialiste për Integrim protestën e një grupi mbështetësish të opozitës në shtëpinë e Ambasadorit të OSBE-së në Tiranë, Bernd Borchardt.
“Veprimi është kryer në urdhra të qarta politike të krerëve të protestës me qëllim frikësimin e Ambasadorit Borchardt dhe familjes së tij, si hakmarrje primitive e atyre që pasi kanë humbur kontrollin e vetes duan të nxjerrin nga kontrolli rendin kushtetues të Shqipërisë!”, shkruan Cakaj në një reagim përmes rrjeteve sociale.
Cakaj ndan një qëndrim krejtësisht të kundërt nga opozitar për vlerësimin e punës së ambasadorit të OSBE-së në Shqipëri.
“Vazhdimisht ka kryer punën e tij me profesionalizëm të plotë. Faji i tij i vetëm është thirrja fisnike për frenim nga dhuna dhe distancim nga veprimtaria e dhunshme. Sulmi ndaj tij është sulm ndaj themeleve të kulturës demokratike, imazhit ndërkombëtar të Shqipërisë dhe përpjekje e drejtpërdrejtë për të cenuar besueshmërinë e Shqipërisë për kryesimin e OSBE-së në 2020”, vijon ai.
Tjetër qëndrim ndan Oerd Bylykbashi. Si ish-bashkëkryetar në Komisionin për Reformës Zgjedhore dhe në çështje të tjera ligjore ku përfaqësonte Partinë Demokratike, Bylykbashi ka bashkëpunuar me zyrën e OSBE-së. Ai nuk përmend emrin e Borchardt, por risjell në kujtesë qëndrimet e dy paraardhësve të tij përballë protestave në Shqipëri.
“Në 2004, në një nga protestat "Nano Ik", policia provokoi protestuesit duke qëlluar në ajër me armë. Protestuesit e irrituar më pas sulmuan portën e Kryeministrisë. Pati nga këto deklaratat standarde që dënuan protestuesit, por një deklaratë bëri diferencë. Ambasadori finlandez i OSBE në Tiranë Osmo Liponnen dënoi provokimet e policisë ndaj protestueve. Më herët, në 2002, ambasadori gjerman i OSBE në Tiranë, Geert Ahrens punoi që reforma zgjedhore të bëhej konsensuale me opozitën dhe punoi për marrëveshjen e madhe politike të 5 prill 2002 Nano-Berisha, që çoi në presidentin konsensual dhe reformën zgjedhore konsensuale. Ai e kuptoi që edhe pse PS kishte votat për të miratuar e vetme Kodin Zgjedhor, ato vota i kishte të vjedhura në zgjedhjet e 2001 dhe nuk mund ta miratonte Kodin me mazhorancë të vjedhur. 15 vite pas deklaratës së Lipponen dhe 17 vite pas përpjekjeve për konsensus të Ahrens, protestuesit dhunohen dhe helmohen barbarisht nga policia pse kërkojnë zgjedhje të lira e të ndershme. Këta dy ambasadorë do të mbahen mend për gjurmën që lanë duke kryer misionin që u ishte besuar”, shkruan ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.