.png)
Administrata Amerikane e Ushqimit dhe Ilaçeve (FDA) ka miratuar shitjen e një medikamenti të ri për të rritur dëshirën seksuale tek femra. E përcaktuar me emrin “Vyleesi” dhe e njohur gjithashtu si “bremelanotide”, ai është i ndërtuar në mënyrë të tillë që gratë mund ta injektojnë vetë.
“Ka gra që për një arsye të panjohur, vuajnë nga reduktimi i dëshirës seksuale të cilat mund të përfitojnë nga trajtimi me ilaçe të sigurta dhe efektive. Ky medikament do të jetë një tjetër alternativë për trajtimin e gjendjes së tyre fizike. Si pjesë e angazhimit të FDA për të mbrojtur dhe për të trajtuar gratë, duke u ofruar ilaçe të avancuara, ne do të vazhdojmë të mbështesim zhvillimin e trajtimeve të sigurta dhe efektive për mosfunksionimin seksual të femrave,” tha Hylton Joffe, drejtor i Qendrës për Vlerësimin e Medikamenteve në FDA.
Ndërsa Julie Krop, mjekja kryesore nga kompania farmaceutike “AMAG Pharmaceuticals Inc”, që krijoi dhe medikamentin e ri, rekomandon që të përdoret 45 minuta përpara marrëdhënieve seksuale. Ajo tha se ilaçi aktivizon receptorët kryesorë të trurit të përfshirë në përgjigjet seksuale, duke nxitur atë që njihet si ngacmim nervor.
“Ky ilaç nuk trajton vetëm dëshirën e ulët seksuale, por ndikon edhe tek marrëdhëniet me partnerët dhe përmirëson cilësinë e jetës. Këto gra po vuajnë vërtetë,” tha Krop në një intervistë.
Sipas ekspertëve, çrregullimi i dëshirës seksuale hipoaktive, po bëhet një problem shumë i madh për gratë, pasi një në 10 gra vuajnë nga ky problem. Gjithashtu administrata këshillon gratë që të përdorin jo më shumë se një dozë në 24 orë.
Por miratimi i shitjes së këtij medikamenti ka ngjallur shumë polemika.
Mes ekspertëve mjekësorë ka mosmarrëveshje për këtë ilaç, pasi disa prej tyre kanë vënë në dukje se pothuajse të gjithë mjekët që kanë miratuar medikamentin, ishin konsulentë ose anëtarë këshillues të “Sprout Pharmaceuticals”, prodhuesi që i prezantoi botës, viagran e parë për femrat, e njohur si Addyi, ose flibanserin, në 2015. Një medikament që ende lobohet për t’u nxjerrë nga tregu.
Por pa marrë shkas nga ky fakt, ata u shprehen se nevojiteshin më shumë informacion përpara se të miratohej për t’u shitur. Gjithashtu, edhe drejtues të shoqatave të ndryshme e kanë cilësuar këtë medikament të panevojshme, pasi gratë nuk e kuptojnë se vuajnë nga një gjendje e tille, kështu që nuk kanë nevojë që të marrin ilaçe shumë kot.
“Është për të ardhur keq që FDA, vendosi të miratojë këtë medikament, pavarësisht mungesa e informacionit të plotë. Plus që ende nuk është e vërtetuar nëse gratë mund të mos ndjejnë dëshirë seksuale dhe të kenë nevojë për medikamente të tilla,” tha Diana Zuckerman, presidentja e Qendrës Kombëtare për Kërkime Shëndetësore në SHBA. Gjithashtu, edhe Cynthia Pearson, drejtoreshë ekzekutive e Rrjetit Kombëtar të Shëndetit të Grave në Mbretërinë e Bashkuar, tha se grupi ishte i zhgënjyer nga miratimi i këtij medikamenti, pasi gratë thjesht nuk kanë informacion të mjaftueshëm për përdorimin e ilaçeve të tilla.
Gjatë akuzave të shumta FDA ka deklaruar se efektiviteti dhe siguria e “Vyleesit” janë studiuar deri në 24 javë, tek 1.200 gra të cilat vuanin nga mungesa e dëshirës seksuale. Gratë pjesëmarrëse e përdorën medikamentin dy ose tre herë në muaj dhe rreth 25 për qind e tyre kishin rezultate të mira. Ndërsa për sa i përket efekteve anësore, ato kishin dhimbje koke dhe të përziera vetëm për disa orë./The Washington Post/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
