.png)
Gazeta Si - Në vitin 2019, Hamasi pësoi një nga dezertimet më serioze në historinë e tij më shumë se 20-vjeçare: Suheib Yousef, një anëtar me bazë në Turqi, iku dhe kontaktoi rrjetin televiziv izraelit “Channel 12” për të treguar historinë e tij.
Yousef nuk ishte thjesht një militant. Ai është djali i një prej shtatë themeluesve të lëvizjes, Sheikh Hassan Yousef dhe sapo arriti në një vend të panjohur në Azi, dha një intervistë shkatërruese.
Ai tregoi korrupsionin e udhëheqësve të Hamasit jashtë vendit dhe kanalet e tyre të pasurimit. Tha se një nga detyrat e agjentëve të Hamasit në Turqi, ishte të përgjonin liderët palestinezë në Bregun Perëndimor dhe në vende të ndryshme arabe, por jo për qëllime politike.
“Ata punonin për interesa të huaja, – zbuloi 38-vjeçari Yousef. – Ata i shesin informacion Iranit në këmbim të mbështetjes financiare”.
Një realitet i harruar
Ishte një vështrim - jo i pari - në një dimension të lëvizjes islame që duket i harruar për momentin.
Korrupsioni në grupet drejtuese të Hamasit është endemik, vetë mediat arabe akuzojnë liderët kryesorë se janë shndërruar në milionerë apo miliarderë falë pushtetit të tyre mbi Gazën.
Sigurisht që fëmijët e Ismail Haniyeh, liderit politik të Hamasit, i cili jeton në rehatinë e Dohas në Katar që nga viti 2020, kanë arritur të dalin me lehtësi nga Gaza në dy vitet e fundit dhe tani udhëheqin jetën e biznesmenëve të pasur.
Ky është rasti i Hazem Haniyeh, djalit të liderit politik të lëvizjes, dalja e autorizuar e të cilit nga Gaza në korrik 2022 shkaktoi protesta në mediat sociale mes njerëzve të zakonshëm të bllokuar në territor.
Një aktivist i quajtur Mahamoud Nashëan, postoi një “selfie” të veshur me një dorezë të zezë, duke buzëqeshur me përçartje; një referencë për një fjalim të famshëm të Haniyeh në vitin 2009, kur udhëheqësi i ardhshëm i Hamasit tha: “Duart tona janë të pastra. Ne nuk vjedhim, nuk kemi prona, nuk ndërtojmë vila...”.
Perandoritë e pasurive të paluajtshme
Disa muaj më vonë, uebsajti saudit “Elaph.com”, raportoi se Maaz Haniyeh, një tjetër djalë i liderit, kishte marrë një pasaportë turke dhe do të menaxhonte pronat e mëdha të pasurive të paluajtshme të familjes nga Stambolli.
Për më tepër, lidhja e Hamasit me Rexhep Tajip Erdogan mbetet e ngushtë, siç mund të shihet nga mbrojtja e lëvizjes nga presidenti turk në ditët e fundit.
Është e vështirë të vlerësohet pasuria e njerëzve që u zgjodhën në vitin 2006, por që atëherë kanë sunduar me forcë mbi palestinezët e Gazës.
“Al-Majalla”, një revistë prestigjioze arabe, vlerëson se numri dy i Hamasit, Musa Abu Marzuk, ka një pasuri prej dy ose tre miliardë dollarësh, ndërsa ish-udhëheqësi politik, Khaled Mashal kontrollon katër miliardë, ashtu si edhe vetë Haniyeh.
Janë akuza të pamundura për t'u verifikuar, por nuk mungojnë provat e korrupsionit sistemik në Gaza.
Jo vetëm sepse këta burra kontrollojnë fluksin e ndihmave nga vende si Katari, Irani dhe komunitetet myslimane në mbarë botën.
"Dorëheqja"
Një burim pasurimi do të ishte një taksë për çdo produkt të kontrabanduar përmes tuneleve për popullsinë e bllokuar në Gaza.
“Udhëheqësit e Hamasit jetojnë jashtë vendit në hotele elegante dhe rrokaqiej luksozë, - denoncoi Suheib Yousef, djali-militant i penduar i një themeluesi të Hamasit. - U bëj thirrje liderëve, përfshirë edhe babain tim, të japin dorëheqjen nga kjo lëvizje korruptive. Jam i sigurt se edhe ai, e di se si janë gjërat”.
Edhe Benjamin Netanjahu e ka ditur këtë prej vitesh. Por asgjë më e mirë për të sesa të ketë miliona palestinezë të qeverisur nga një grusht kriminelësh, të gatshëm të grabisin njerëzit e tyre dhe t'i ekspozojnë ata si një mburojë njerëzore, pas së cilës fshihen raketat lëshuese.
Vetëm në këtë mënyrë kryeministri i Izraelit mund të vazhdojë të injorojë dhimbjen e palestinezëve të bllokuar nga Hamasi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
