.png)
Ardian Çapja ka lënë ambientet e QSUT-së në repartin e kardiologjisë, ku ndodhej për shkak të disa probleme kardiake, për t’u transferuar në spitalin e burgut.
Përmes avokatit të tij, Çapja ka kërkuar lirinë në Gjykatën e Apelit Durrës, duke argumentuar për një masë më të butë.
Pikërisht në ambientet e QSUT-së pak ditë më parë, ndaj tij u caktua masa e sigurisë “arrest në burg”.
LEXO EDHE:
- Ardian Çapja lihet në burg, masa e sigurisë i jepet në spital (Foto)
- Si u arrestua Ardian Çapja në Elbasan, çfarë i gjeti policia në banesë (Video)
Ai u arrestua pak ditë më parë, gjatë operacionit “Krasta 2021”, i dyshuar si porositësi i vrasjes së babë e bir, Gentian dhe Nezir Beqirit në vitin 2012 në Elbasan.
Në kërkim për të njëjtën ngjarje, është edhe Florenc Çapja, edhe ky i dyshuar si organizator i vrasjes së dyfishtë, ku shkak pretendohet të jetë një seri hakmarrjesh mes dy familjeve.
Në fakt, hetimet për ngjarjen u rihapën në vitin 2018, ku prova më e fortë e Prokurorisë së Elbasanit, është dëshmia e Ervis Bardhit, i konsideruar si ekzekutuesi fizik i Gentian Beqirit në apartamentin e tij.
Bardhi, pasi u zbulua nga shenja e gishtit në targën e makinës së përdorur për vrasjen, zgjodhi të bashkëpunojë me drejtësinë duke treguar detaje. Dëshmia e tij u konsiderua e besueshme nga Prokuroria, teksa ai ka treguar me detaje mënyrën e vrasjes dhe faktin që ka marrë 50 mijë euro nga Çapjat për vrasjen.
Emri i Ardian Çapjes ka dalë shpesh në skedat e Policisë së Elbasanit, ku ai është shoqëruar disa herë. Vetëm në vitin 2017 ai u ka shpëtuar 3 atentateve me armë dhe eksploziv.
Çapja është arrestuar nga forcat speciale RENEA, pas një operacioni të zhvilluar në qytetin e Elbasanit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
