.png)
Gazeta Si – Të martën, Festivali i Letërsisë në Londër, tani në vitin e tij të 19-të, njoftoi se kuratorja e këtij viti do të jetë këngëtarja shqiptaro-britanike, Dua Lipa.
Lajmi qarkulloi gjerësisht dhe shkaktoi disa habi, pasi Dua Lipa, e cila së fundmi mbushi 30 vjeçe, është një nga yjet më të dashura dhe të famshme të popit të gjeneratës së saj dhe kurimi i një festivali letrar është një rol që shumë nuk e prisnin.
Megjithatë, për disa vite tani, krahas karrierës së saj në këngë, Dua Lipa i është përkushtuar vazhdimisht përhapjes së fjalës për librat dhe letërsinë, duke tërhequr një numër të madh ndjekësish.
Ajo nuk është as e vetmja dhe as e personazhi i parë i famshëm që ka filluar një klub të suksesshëm libri dhe që prodhon përmbajtje rreth leximit të saj: në Shtetet e Bashkuara, për të përmendur vetëm disa, janë aktoret Reese Witherspoon dhe Natalie Portman, prezantuesin Jimmy Fallon dhe prezantuesja televizive, Oprah Winfrey, klubi i librit i të cilës është mes atyre më me ndikim në botë.
Dua Lipa, megjithatë, është dalluar për aftësinë e saj për të kryer intervista origjinale dhe të thelluara dhe për zgjedhjen e saj të librave që nuk janë domosdoshmërisht të njohur, duke fituar njohje dhe miratim edhe midis njerëzve të industrisë.
Dua Lipa zyrtarisht filloi të punojë me librat në vitin 2022, kur themeloi “Service95”, një platformë që tani përfshin një buletin, një podcast në të cilin ajo diskuton një libër të ri çdo muaj dhe një faqe interneti informacioni me artikuj të shkruar nga kontribues të jashtëm (ajo ka lindur në vitin 1995).
Pjesa më e njohur e projektit është podcasti “Klubi i Librit” me Dua Lipën, i publikuar në Spotify dhe YouTube, me një kanal që krenohet me 162,000 abonentë.
Çdo muaj, Dua Lipa zgjedh një libër dhe interviston autorin e tij: bisedat zakonisht zgjasin pak më pak se një orë dhe janë shumë të rrjedhshme dhe të pastrukturuara.
Disa pyetje janë të sajat, të tjerat i zgjedh nga ato të dërguara nga abonentët e buletinit. Në një artikull në “Guardian”, të titulluar “A është Dua Lipa Intervistuesja më e Mirë e Librave?”, gazetari Joel Snape shkroi se puna e këngëtares është ndryshe nga çdo gjë tjetër atje.
Në të vërtetë, mënyra se si zhvillon intervistat, zbulon se ajo është një lexuese mjaft e apasionuar: Lipa shpesh ndan reflektime mbi atë që ndjen gjatë leximit ose atë që imagjinon se autorja mendoi ose ndjeu gjatë shkrimit.
Intervistat shpesh zhvillohen nëpërmjet video-thirrjeve: nuk ka studio apo ambient podkasti, dhe estetika e thjeshtë jep ndjesinë e të dëgjuarit të një bisede midis miqve në vend të një interviste tradicionale.
Ajo shpesh zgjedh libra më të vjetër ose ato të botuara nga botues më të vegjël, duke ndihmuar në rritjen e profilit të autorëve më pak të njohur, siç është autori meksikan, Guadalupe Nettel, i cili është përkthyer ndërkombëtarisht, por është ende pak i njohur për publikun e gjerë.
Por të ftuarit e saj kanë përfshirë edhe shkrimtarë shumë të famshëm, si Margaret Atwood, autore e “The Handmaid’s Tale”; Khaled Hosseini, me të cilin diskutoi për “A Thousand Splendid Suns”; Hernan Diaz, fitues i Çmimit Pulitzer për librin e tij “Trust”; dhe shkrimtarja polake fituese e Çmimit Nobel, Olga Tokarczuk.
Një vit më parë, YouTuber-i letrar, Blake Lefray, publikoi një video, e cila mblodhi 2 milionë shikime, duke nxjerrë në pah pikat e forta të intervistave të Dua Lipës, duke i krahasuar me ato të zhvilluara me autorë të njohur në emisione të vona të natës, si “The Tonight Show” ose në media tradicionale, si “The New York Times”.
Lefray vuri në dukje se, krahasuar me atë të Dua Lipës, të tjerat ishin shpesh të paqarta dhe të parashikueshme, me pyetje standarde që kishin tendencë të përsëriteshin.
Fakti që intervistat mbahen çdo muaj, i jep Lipës kohë për t’u përgatitur, lexuar dhe hulumtuar dhe meqenëse nuk është e lidhur me turne promovuese apo orare editoriale, ajo mund të zgjedhë tituj që e interesojnë vërtet. Lipa ka thënë gjithashtu se merr kënaqësi të veçantë nga intervistat.
“Service95” lindi në vitin 2022 si një buletin, në të cilin Lipa ndante këshilla që, në një kuptim mjaft të gjerë, lidheshin me “stilin e jetesës”: vende për të ngrënë, gjëra për të bërë në qytete të ndryshme, sugjerime kulturore dhe në përgjithësi, përvoja personale.
Lipa ka folur disa herë për fiksimin e saj pas listave dhe për faktin se i ka ato për një larmi të gjerë rastesh: një për filma, një për libra, por edhe lista shumë specifike, si estetistët më të mirë në një qytet të caktuar.
Por edhe para se të fillonte “Service95”, Lipa shpesh ndante leximet e saj në Instagram. Në vitin 2020, për shembull, ajo postoi një foto të saj duke lexuar romanin, “Një jetë si shumë të tjera”, nga Hanya Yanagihara, botuar pesë vjet më parë.
Pas këtij postimi, shitjet e librit u rritën ndjeshëm: redaktori Ravi Mirchandani, i cili e botoi romanin në Mbretërinë e Bashkuar, i tha “Telegraph” se rritja e shitjeve ishte “tërësisht e atribuueshme Dua Lipës pa ndonjë paqartësi të veçantë”.
Me “Service95”, Lipa arriti të fitonte njëfarë legjitimiteti brenda botës letrare famëkeqe për selektivitetin. Në vitin 2022, ajo u ftua në ceremoninë e Çmimit Booker, një nga çmimet letrare më prestigjioze në botë, ku mbajti një fjalim rreth marrëdhënies së saj me leximin, duke shpjeguar, ndër të tjera, se si librat përfaqësojnë një mënyrë për të që të relaksohet dhe të ndihet mirë.
Ajo u ftua nga Gaby Wood, drejtoreshë ekzekutive e Fondacionit të Çmimit Booker, e cila kishte vënë në dukje në profilin e saj në Instagram se ajo kishte shije të shkëlqyer në zgjedhjet e saj të leximit.
Në një intervistë me “Telegraph”, Wood shpjegoi se Lipa tani vlerësohet përgjithësisht në industrinë botuese, sepse “ajo ka transformuar lexueshmërinë: njerëzit e ndjekin dhe e respektojnë atë dhe ajo sjell audiencën për muzikën e saj me vete”.
Puna e Dua Lipës në promovimin e librave është gjithashtu e dukshme, sepse vitet e fundit, suksesi i përmbajtjes letrare në mediat sociale, si Instagram dhe TikTok ka bërë që shumë personazhe të famshëm të ndajnë foto dhe komente rreth librave që po lexojnë.
Megjithatë, cilësia e përmbajtjes është shpesh shumë e ulët dhe nuk është e pazakontë që librat të shfaqen thjesht për qëllime estetike.
Disa vjet më parë, u fol shumë për shfaqjen e roleve të reja, specifike profesionale: ai i “stilistit të librave”, ekspertit që këshillon personazhet e famshëm se cilët libra të shfaqin në mediat sociale dhe ai i dizajnerit që zgjedh se cilët libra do të mbushin raftet e librave të shtëpive të personazheve të famshëm.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje