Nga Gazeta ‘Si’- Kryeministri Edi Rama është shprehur se do të fillojë implementimi i projektit për survejimin me kamera të vendit pas marrëveshjes së arritur me Emiratet e Bashkuara Arabe.
Kreu i qeverisë u shpreh se ky instrument i ri do t’i vijë në ndihmë Policisë së Shtetit, ndërsa theksoi se do të jetë një transformim epokal sa i përket survejimit me kamera të qyteteve, duke shtuar se fokusi është qarkullimi rrugor.
Rama u shpreh se sistemi do të fillohet të aplikohet fillimisht në 20 qytete të vendit, ku policia do monitorojë në kohë reale përmes sallave.
“Dhe sistemi verifikon jo thjesht me fotografi të përgjithshme, por me personin, emrin, mbiemrin dhe të gjithë kartelën e tij në aspektin e precedentëve penale”, deklaroi kreu i qeverisë.
Rama u shpreh se së shpejti fillon edhe investimi që i njëjti sistem të hyjë në rrugët kombëtare.
“Qeveria do ta ndihmojë Policinë e Shtetit me një instrument të ri, do të kemi një transformim epokal sa i përket survejimit me kamera të qyteteve dhe me fokus qarkullimin rrugor, shkeljet dhe shkelësit. Një sistem i bazuar tek fjala e fundit e teknologjisë digjitale, që do i japë mundësinë policisë së shtetit që në kohë reale, përmes sallave të monitorimit të të gjithë qyteteve që do ta kenë këtë sistem fillimisht, do të fillohet me 20 qytete mos gabohem.
Së shpejti fillon edhe investimi që i njëjti sistem të hyjë në rrugët kombëtare, do të fillohet me 200 km e para, dhe ai sistem do të japë mundësinë që ankesat e çdo qytetari të jenë të verifikueshme në kohë reale. Edhe kur qytetari ankohet me të drejtë, ka raste që bën telefonatë për të nxjerrë një inat me një komshi, por këto janë pjesë e jetës.
Dhe sistemi verifikon jo thjesht me fotografi të përgjithshme, por me personin emrin mbiemrin dhe të gjithë kartelën e tij në aspektin e precedentëve penale.
Është projekt i jashtëzakonshëm që më në fund e kemi garantuar edhe si financim në bashkëpunim me partnerët e Emirateve do të fillojmë ta implimentojmë”, tha Rama.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
