Nga Gazeta ‘Si’- Presidentja e Kosovës, Vjosa Osmani thotë se Kosovës i duhet Shqipëria në krah, për të arritur integrimin në Bashkimin Evropian.
Gjatë fjalës së saj në mbledhjen e përbashkët të dy Kuvendeve, të Kosovës dhe Shqipërisë, në Prishtinë, Osmani u shpreh se Bashkimi Evropian do të jetë më i plotë dhe i sigurt me anëtarësimin e Kosovës dhe Shqipërisë.
Ajo shtoi se duhet kthyer vëmendja te shqiptarët në Luginë, si dhe në Maqedoninë e Veriut.
“Ne po jetojmë në një kohë të trazuar që kërkon bashkëpunim. Kjo nuk është thjesht një zgjidhje. Një Shqipëri më e fortë do të thotë edhe një Kosovë më e fortë. Historia nuk do të na gjykojë me dashamirësi për të ndërtuar harmoninë e domosdoshme. Secili prej nesh duhet ta luajë rolin e tij në avancimin e shteteve brenda familjen e madhe europiane.
Shqipëria po bën hapa vendimtar drejt rrugës së BE-së. Kosova mbetet e palëkundur drejt rrugës së saj për integrim në BE dhe angazhimi ynë është i çdoditshëm. Padrejtësitë ndaj Popullit të Kosovës sa vijnë e rritet, na duhet mbështetje e palëkundur e Shqipërisë në këtë drejtim.
Të unifikojmë politikën e jashtme, të bashkëpunojmë në mbrojtjen e të drejtave të shqiptarëve kudo jetojnë. Shqiptarët në Bujanoc, Preshevë dhe Medvegjë, i kanë sytë nga ne. Për Kosovën, Shqipëria ka qenë më shumë se një shtet motër.
Për Kosovën, Shqipëria ka qenë më shumë se një shtet motër, ka qenë një aleat i palëkundur. Edhe sot, Shqipëria mbetet shtyllë e fortë e mbështetjes sonë.
Shpreh vlerësimin për të gjithë deputetët, përkushtimi juaj për demokracinë, është dëshmi e unitetit. Zëri i deputetëve të Shqipërisë në Asamblenë Parlamentare është i vlerësuar nga populli i Kosovës. Le t’i afrojmë dy shtetet tona çdo ditë e më shumë. Së bashku sy dy shtete, të bashkuara nga gjaku, vizioni, të ecim përpara, krah për krah, siç kemi bërë gjithmonë”, theksoi ajo.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
