.png)
Nga Gazeta ‘Si’ – Partia Demokratike ka reaguar pas postimit në platformën ‘X’ të Ambasadës së Shteteve të Bashkuara në Tiranë, bërë mëngjesin e sotëm, ku nënvizohej se nuk ndryshon kurs sa i takon marrëdhënies me kryetarin e PD-së, Sali Berisha.
Burime nga selia blu bëjnë me dije se reagimi nga selia diplomatike e SHBA vjen pas takimit që e ngarkuara me punë, Nancy VanHorn, ka zhvilluar gjatë javës së shkuar me disa deputetë të Partisë Demokratike.
Deputetët e opozitës, në takimin që kishin me të, kanë ngritur shqetësimin për zgjedhjet e 11 majit, përdorimin e pushtetit gjatë procesit elektoral, ndikimin e krimit të organizuar, por edhe sa i përket hapësirës së opozitës në Kuvend.
PD është ankuar edhe për pavarësinë e institucioneve veçanërisht të atyre të drejtësisë, ku kanë kërkuar edhe në këtë bisedë krijimin e qeverisë teknike para zgjedhjeve.
Pjesë e takimeve kanë qenë 6 deputetë, Jorida Tabaku, Oerd Bylykbashi, Tomorr Alizoti, Helidon Bushati dhe Kreshnik Çollaku.
Ajo që bie në sy është fakti se në takimin me deputetët demokratë nuk ka qenë i pranishëm kreu i grupit parlamentar të PD-së Gazment Bardhi, i cili pas shpalljes së Berishës non grata në vitin 2021 ka qenë një ndër deputetët me të cilin ambasada amerikane mbante kontakte të rregullta.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
