.png)
Nga Gazeta ‘SI’ – Pas paralajmërimit të kreut të Autoritetit të Konkurrencës, Denar Biba se ky institucion do të marrë përsipër edhe kontratat e prokurimit, është hedhur për konsultim projektligji.
Sipas ndryshimeve, në përgjegjësinë e AK shtohen edhe ‘praktikat e bashkërenduara’ si edhe ‘marrëveshjet në ofertë’.
E para ka të bëjë me koordinimin ndërmjet ndërmarrjeve të cilat, pa arritur në fazën e lidhjes së një marrëveshjeje formale, bashkëpunojnë me vetëdije në praktikë duke kufizuar, deformuar ose shtrembëruar konkurrencën në treg.
E dyta është marrëveshja ku ndërmarrjet gjatë procedurave të prokurimit publik, nuk konkurrojnë midis tyre por bien dakord fshehurazi për të caktuar çmimet ose për të ulur cilësinë e mallrave, punëve ose shërbimeve për blerësit që dëshirojnë të prokurojnë produkte, shërbime ose punë nëpërmjet një procedure prokurimi apo kur bien dakord të koordinojnë ofertat e tyre në prokurimet publike.
Këto oferta mund të jenë të mbuluara, të përmbajtura në rotacion ose në formën e ndarjes së tregut.
Konkurrenca propozon dhe ndryshime të tjera në ligj, duke zgjatur mandatin e anëtarëve nga 3 në 5 vite dhe subjektet nuk do të mund të ankimojnë vendimet e Komisionit për hapjen e hetimit paraprak.
Të ardhurat që AK do të marrë nga gjobat, do t’i derdhë në arkën e shtetit.
Garat e padrejta dhe proceset abuzive në tenderimet publike kanë qenë prej kohësh shqetësim i ekspertëve të fushësh dhe vetë përfaqësuesve të qeverisë. Njëkohësisht në konsultim gjendet dhe projektligji i ri për prokurimet që pritet të kalojnë në një organ qendror e nuk do të kryhen më nga vetë institucionet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
