Gazeta Si – Fillimisht u mendua për arrest kardiak, por sipas autopsisë Ivana Trump vdiq nga plagët e marra pasi u rrëzua nga shkallët.
Këtë e ka bërë të ditur rrjeti televiziv amerikan ABC, i cili citon burime të stafit mjekësor të përfshirë në ekzaminimin e autopsisë.
Ish-bashkëshortja e Donald Trump u gjet e pajetë më 14 korrik në fund të shkallëve të banesës së saj në Upper East Side të Nju Jorkut.
Siç raportojnë mediat amerikane, vdekjen e Ivana Trump e konstatuan mjekët ndihmës së shpejtë në Manhattan, të cilët ndërhynë në përgjigje të thirrjes së urgjencës për një arrest kardiak të dyshuar.
Burime policore më pas bënë me dije se nuk kishte asnjë element dyshimi për vdekjen dhe se biznesmenja kishte vdekur për shkaqe natyrale.
Megjithatë, gjatë orëve në vijim, hetuesit filluan të hetojnë mundësinë që gruaja të kishte vdekur si pasojë e rënies.
Një element tjetër që duket se konfirmon këtë hipotezë vjen nga “New York Post”. Zach Erden, një mik i Ivana Trump, shpjegoi se kohët e fundit gruaja ishte ankuar se kishte probleme me ecjen.
“Ajo kishte dhimbje në këmbë dhe nuk ishte në gjendje as të dilte jashtë”, tha ai për gazetën amerikane. Hera e fundit që Ivana Trump u fotografua në rrugët e Manhatan-it ishte më 22 qershor.
Nuk dihet ende nëse rënia ka qenë aksidentale apo e shkaktuar nga një sëmundje. Megjithatë, ajo që hetuesit përjashtuan që në fillim si pistë, është vrasja: siç shpjegohet nga “New York Times”, vdekja ishte aksidentale dhe nuk kishte shenja të hyrjes me forcë në shtëpi.
Në shenjë “dashurie dhe respekti” për ish-bashkëshorten e tij, Donald Trump ndërkohë ka shtyrë tubimin e planifikuar në Arizona.
Ngjarja është shtyrë për 22 korrik. Ivana është nëna e tre fëmijëve të saj Ivanka, Donald Jr dhe Eric.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
