Një person ka mbetur i vrarë dhe një tjetër i plagosur pas një breshërie automatike që ka tronditur qytetin e Shkodrës mëngjesin e kësaj të premte.
Naim Bajri, 68 vjeç ka mbetur i vrarë në vend dhe Astrit Zeneli është plagosur nga sulmi me armë zjarri nga persona ende të paidentifikuar.
Ngjarja ka ndodhur në lagjen “Partizani” në vendin e njohur si “Markata e Rusit”.
Sipas dëshmive paraprake, viktima dhe i plagosuri ishin duke pirë kafen e mëngjesit në momentin kur pranë tyre në rrugën përballë lokalit kalon një automjet tip “Mercedes Benz”.
Shënjestra e sulmit ka qenë Naim Bajri, të cilin autori e ka qëlluar nga afër, ndër një tjetër person ndodhej në drejtimin e automjetit. Pas sulmit, ata janë larguar me shpejtësi në drejtim të anashkalimit të Shkodrës.
Pak minuta më vonë, në vendin e njohur si livadhi, në lagjen “Guerrile”, Shkodër, është gjetur i djegur një mjet që dyshohet të jetë përdorur nga autorët.
Naim Bajri ka marrë të paktën 7 plumba dhe ka gjetur vdekjen në vend, ndërsa i plagosuri një plumb në krah dhe ndodhet jashtë rrezikut për jetën.
Lokali ku ndodhi ngjarja është në pronësi të Naim Bajrit, ndërsa i plagosuri ishte i punësuar i tij në këtë lokal.
Naim Bajri është babai i Indrit Bajrit i ekzekutuar me snajper më shum se 20 vite më parë, në tetor të vitit 2001 në Shkodër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
