.png)
Sindikata e Pavarur e Arsimit thotë se mësuesit në mbarë vendin janë të pakënaqur me kushtet e punës. Sindikata kishte njoftuar të gjithë mësuesit e kryeqytetit që të mërkurën më 19 janar, të pezullojnë orën e parë të mësimit në rast se duan t’i bashkohen protestës për mungesën e regjistrave në shkollë, kushtet minimale të punës si dhe për pagat e pamjaftueshme.
I kontaktuar nga Gazeta “Si”, zv/presidenti i Sindikatës së Pavarur të Arsimit Shqiptar, Isa Halilaj, thotë se sindikata e Tiranës ka pezulluar përkohësisht bojkotin, pasi këtë të mërkurë pritet të mblidhet Këshilli Kombëtar i Arsimit i drejtuar nga ministrja Evis Kushi.
Halilaj thotë se gjatë mbledhjes do të paraqesin pakënaqësitë e mësuesve që nuk janë vetëm problemet e sipërpërmendura; janë shumë më tepër së aq.
“Përveç regjistrave që duhet të jenë fizikisht në shkolla, pavarësisht përpjekjeve për regjistrat elektronikë, kemi problematika me transportin e mësuesve, veçanërisht në zyrat e reja arsimore, pagesat e vonuara të mësuesve për shkak të problemeve me fondet, orët suplementare të papaguara, mësimi plotësues i papaguar, korrigjimet e provimeve të 9-vjeçare të papaguara e të tjera”, tha Halilaj.
Sipas zv/presidentit të Sindikatës së Arsimit, në mbledhjen e së mërkurës, sindikata do t’i kërkojë ministres Kushi një takim të veçantë për të diskutuar më tej, në të kundërt do të vijojnë me bojkotet deri në protestë.
Sindikata e Pavarur e Arsimit thotë se listës së problematikave i është shtuar së fundmi edhe mbulimi i orëve mësimore për shkak të infektimit të shumë mësuesve me COVID-19.
Ndryshe nga viti i kaluar, sivjet nuk është vënë në dispozicion një fond i veçantë për mësimdhënien gjatë pandemisë.
Ndërkohë më datën 26 janar, në orën 14:30 SPASH ka lajmëruar gjithashtu edhe për një formë tjetër proteste përpara Zyrës Arsimore Tiranë.
