Këtë të hënë, vendi ynë është përfshirë sërish nga moti i keq dhe reshjet e shiut me stuhi.
Moti i keq dhe deti i dallgëzuar ka penguar lëvizjen e trageteve në dy anët e Adriatikut si dhe qytetin bregdetar të Vlorës.
Kapitaneria e portit detar të Durrësit thotë se tragetet nuk janë nisur natën e kaluar nga Durrësi drejt Barit dhe anasjelltas.
Gjithashtu sektori i peshkimit është pezulluar për shkak të erës së fortë dhe detit që shkon deri në 7 ballë në det të hapur.
Edhe aktiviteti tregtar është pezulluar përkohësisht për shkak të erës së fortë që pritet të ketë tendencë rritje deri në orët e pasdites.
Moti i keq shkaktoi probleme edhe disa ditë më parë në këtë qytet, duke shkaktuar përmbytje në disa akse kryesore.
Shirat e rrëmbyeshëm dhe era e fortë ka shkaktuar disa dëmtime përgjatë Lungomares. Disa pemë dhe kabina prej druri janë rrëzuar.
Lundrimi detar vijon të jetë i pezulluar për shkak të motit të keq.
Ndërkohë, problematike paraqitet situata edhe në rrugën Kukës-Shishtavec. Shkëmbinj të përmasave të jashtëzakonshme shkëputen nga faqet e malit e bien në rrugë në këto kohë shirash në verilindje.
Bashkia ka angazhuar mjetet e saj për pastrimin e rrugës deri vonë pas mesnate e për ta rikthyer në normalitet, por problemi mbetet i pazgjidhur pa sipërmarrje. Reshjet e shiut nuk shkaktuan probleme vetëm në këtë aks rrugor, por edhe në disa akse të tjera rurale në fshatrat e thella.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
