Gjithmonë e më shumë diskutime dhe polemika për sa i takon dhënies së “Topit të Artë” dhe në edicionin e radhës nuk është çudi të ketë ndonjë ndryshim për të dhe çmimet e tjera individuale. Sezonin e fundit ishte Luka Modriç që arriti të prishte hegjemoninë e Kristiano Ronaldos dhe Lionel Mesit. Edhe këtë herë mbetet një temë e nxehtë diskutimi se kujt i takon çmimi prestigjioz.
Për këtë argument ka folur së fundi portieri i njohur spanjoll, Iker Kasijas. Teksa ishte duke biseduar me fansat në Tuiter, ai u është përgjigjur disa pyetjeve interesante, duke dhënë edhe një propozim interesant, që ka filluar ta trazojë botën e futbollit. I pyetur për mundësinë e fitimit të “Topit të Artë” nga mbrojtësi Virxhil van Dajk, i vlerësuar nga UEFA si lojtari më i mirë i Ligës së Kampionëve sezonin e fundit, Kasijas theksoi: “Sigurisht, ishte mbrojtësi më i mirë i sezonit të kaluar. Por për “Topin e Artë” çështja është më e komplikuar. Kush e meriton? Sipas meje, duhet të ketë një çmim për çdo rol: portieri më i mirë, mbrojtësi më i mirë, mesfushori më i mirë dhe sulmuesi më i mirë”.
Kasijas është pyetur edhe për të ardhmen, për rikuperimin e plotë pas problemeve kardiake dhe mundësisë së rikthimit te Real Madrid si drejtues. “Kam filluar një fazë të re të procesit të rikuperimit. Le të themi se po i kërkoj diçka më shumë zemrës, diçka të vogël. Duhet të rikuperohem plotësisht. Rikthimi te Reali? Jam shumë krenar që e kam veshur atë fanellë për 25 vjet”, u shpreh portieri i suksesshëm, që ka fituar gjithçka në karrierë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
