Kukësi ka fituar Kupën e Shqipërisë në finalen e zhvilluar përballë Tiranës. 2-1 është mbyllur përballja e luajtur në stadiumin “Elbasan Arena”. Kukësi kështu ia del që ta mbyllë me një trofe këtë kampionat, pasi e humbi betejën me Partizanin në luftën për titullin kampion. Për Tiranën ky sezon mund të konsiderohet një dështim i plotë, pasi nuk mundi të shkojë në Europë dhe mbijetesën e siguroi vetëm në javën e fundit.
Ndeshja e luajtur në Elbasan pas një rrebeshi të vërtetë shiu ishte me dy fytyra. Një Tiranë e mefshtë në minutat e para të ndeshjes nuk mundi dot ta evitonte golin e Shkurtajt. Kukësi kishte shanset për të shënuar sërish, por pa sukses, duke u ndalur nga Ilion Lika. Me 45 minutat e para që u mbyllën në favor të kuksianëve, në pjesën e dytë Tirana hyri në fushë me dëshirën për t’ia ndryshuar fatin kësaj përballje.
Ngo do të barazonte, duke ngjallur shpresën e tifozëve bardheblu. Por shumë shpejtë kjo shkëndijë do të venitej, pasi Kukësi shënoi sërish me anë të Regxhinaldos. Sulmuesi afrikan fitoi edhe Këpucën e Artë të kampionatit shqiptar, duke u rikonfirmuar si një lojtarët më të mirë të viteve të fundit që ka bujtur në Superligën Shqiptare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
