Majkëll Xhordan ka dhuruar 2 milionë dollarë nga përfitimet e “Last Dance” për bankat lokale të ushqimit në Karolina dhe Çikago, sipas “Variety”. “Në këto kohë të vështira dhe në një vit vështirësish të paimagjinueshme për shkak të Covid-19, është më e rëndësishme se kurrë për t’u ndalur pak dhe për të ndihmuar të tjerët, ata që kanë nevojë”, - ka thënë Xhordan.
“Jam krenar që po dhuroj të ardhurat e “The Last Dance” për “Feeding America” dhe bankat e ushqimit që bëjnë pjesë në Karolina dhe në Çikago për të ndihmuar në ushqyerjen e familjeve që kanë nevojë”, - ka shtuar më tej legjenda e basketbollit amerikan. Ai ka përfituar më shumë se 4 milionë dollarë për pjesëmarrjen në dokumentarin seri, fitues të “Emmy Award”, që tregon sezonin e tij të fundit me Çikago Bulls.
Më parë Xhordan ka bërë të ditur se do t’i dhuronte të gjitha të ardhurat për “Friends of the Children”, një organizatë jofitimprurëse që ndihmon fëmijët me probleme. Së fundi ish-basketbollisti i famshëm është impenjuar edhe në dhënien e 100 milionë dollarëve gjatë 10 viteve të ardhshme për shoqatat që merren me barazinë racore, pas ngjarjes së rëndë të vrasjes së Xhorxh Floid.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.