Në tryezën e punës të kryetares së Kuvendit, Lindita Nikolla, ka ende një çështje të pazgjidhur se kujt i takon bashkëdrejtimi nga opozita në komisionin për reformën zgjedhore.
Më saktë kush do të jetë palë negociuese përballë Damian Gjiknurit (përfaqësues i PS për reformën) sa kohë që deri tani nuk është bërë asgjë në këtë drejtim.
Partia Socialiste e ka shtyrë në kohë kërkesën e Gazment Bardhit për të zëvendësuar Enkelejd Alibeajn (që është aktualisht bashkëkryetar) me emrin e Oerd Byklykbashit.
Gazment Bardhi bashkë me disa deputete të tjerë të PD-së bllokuan seancën e fundit të enjten e kaluar në Kuvend, duke i kërkuar Nikollës që të fuste në rendin e ditës kërkesën e tij.
Për bllokimin e seancës, Bardhi dhe 7 deputetë të PD u përjashtuan pas një kërkese të mëvonshme nga grupi i PS.
Më herët, PS-ja, në rrugë jo zyrtare, e ka njoftuar Bardhin, se Bylykbashi nuk mund të jetë bashkëkryetar referuar një vendimi më të hershëm të PD-së për ta përjashtuar atë nga grupi parlamentar i PD-së.
Që do të thotë se Bylykbashi nuk mund të kërkojë bashkëdrejtimin në emër të PD-së sa kohë që zyra e Protokollit nuk e njeh si deputet të PD, por të pavarur.
Për këtë arsye, së fundmi, Gazment Bardhi i ka çuar një kërkesë të dytë Lindita Nikollës, duke e njoftuar se vendimi për të përjashtuar Bylykbashin nga grupi parlamentar është revokuar një muaj më parë.
Nuk dihet se kur ka mbërritur shkresa (pa datë) e Bardhit tek Nikolla sa kohe që ky i fundit është i përjashtuar për 10 ditë nga punimet e Kuvendit pas vendimit të Sekretarit të Etikës ditën e premte.
Ajo që dihet është se Bardhi ka vënë në lëvizje manovrat e fundit për të zyrtarizuar edhe sipas protokollit emrin e Bylykbashit si bashkëdrejtues në komision.
Lulzim Basha, ndërkohë nuk e ka vënë në dyshim që përfaqësues i PD-së për reformën do të jetë Enkelejd Alibeaj.
Të dy ata (si Basha ashtu edhe Alibeaj) folën në një takim të fundit me demokratë për kërkesat që PD-ja kishte për reformën zgjedhore, përfshi edhe listat e hapura.
Berisha ka akuzuar se Basha dhe Rama po bëjnë marrëveshje nën tavolinë edhe për reformën me qëllim që nga ana e tij Basha të marrë mandate deputetësh zgjedhjet e 2025.
Ivi Kaso, përfaqësues ligjor i PD-së së Rithemelimit është shprehur më herët se, “Basha po kërkon të marrë një zonë më të madhe zgjedhore që të shtojë numrin e deputetëve si dhe listat e hapura dhe në këmbim mazhoranca do t’i kërkojë atë që nuk e ka pasur në dy reformat e fundit zgjedhore, ‘Primin’, rolin kryesor”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.