.png)
Gazeta Si - Një punonjës policie është arrestuar në flagrancë, me akuzën e shpërdorimit të detyrës. Në pranga është vënë efektivi Alkid Ndreu, 47-vjeç, me detyrë specialist i Policisë Rrugore dhe anëtar i Komisionit të Gjobave në varësi të Drejtorisë së Policisë së Tiranës.
Pas disa ditësh hetime nga AMP, u zbulua se polici kishte marrë përmes një sekseri një shumë prej 70 mijë lekësh për t’i dhënë një qytetareje patentën që e kishte të bllokuar me një afat 3 mujor.
Qytetares me iniciale B.D., i ishte të bllokuar leja e drejtimit nga data 24 nëntor deri më 17 shkurt të vitit 2023.
Por përmes ryshfetit ka arritur që ta marrë lejen e saj të drejtimit. Në pranga ka rënë gjithashtu edhe Eduart Caka nga Kruja, i cili përmes njohjeve ka marrë shumën e parave nga shtetasja B.D., dhe ia ka dhënë efektivit Ndreu.
Caka akuzohet për korrupsion pasiv dhe ushtrim i ndikimit tek personat me funksione publike.
Në gjendje të lirë, por e përballur me të njëjtat akuza, do të hetohet nga policia edhe edhe shtetasja B.D.
Gjithashtu është sekuestruar edhe Kartoteka e Komisionit të gjobave për t'u verifikuar afro 2 mijë leje drejtimi, për të verifikuar nëse ka pasur ose jo abuzime edhe me raste të tjera.
Në njoftimin e saj për shtyp, policia thekson se po punohet për identifikimin e punonjësve të tjerë të policisë, të cilët dyshohet se janë përfshirë në ktë ngjarje.
Hetimet nisen në rrugë operative nga Agjencia e Mbikëqyrjes Policore, ndërsa dosja është referuar në Prokurorinë e Tiranës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
