.png)
Kryeministri Edi Rama ishte sërish sot në zonën e Plazhit në Durrës, për të parë ecurinë e punimeve për riparimin e godinave të banimit pas tërmetit shkatërrues të 26 nëntorit të vitit të shkuar. I shoqëruar nga kreu i Bashkisë së Durrësit, Zhuljen Varfaj dhe nga zëvendësministrja e Brendshme Rovena Voda, Kryeministri inspektoi një nga godinat ku meremetimi ka nisur pas marrjes së lejes në 24 janar. Ndërkohë vazhdojnë miratimet e lejeve për këtë kategori godinash, informoi zëvendësministrja Voda, “bazuar në projekte të përputhura rigorozisht me standardet ligjore dhe europiane të ndërtimit”.
“Ky është problemi kryesor që nuk e keni vetëm ju, - u theksoi Kryeministri. - Duan punë, por kur vjen puna për punë, jo vetën që duan punë shteti, por, edhe kur i thua kualifikohuni, jo të gjithë janë gati. Megjithatë, ne e kemi kaluar ligjin tani, për të lehtësuar maksimalisht sjelljen e fuqisë punëtore nga jashtë. Sado absurde që duket, ky është fakti dhe nuk është vetëm tek ne, është dhe në rajon”, tha Rama. Ai u fokusua te ligji “Për të huajt” i miratuar së fundmi nga Parlamenti, ku u jep lehtësira të huajve që duan të punojnë në Shqipëri dhe që vijnë vetëm për shkak të punësimit në zonat e prekura nga tërmeti dhe jo vetëm.
“Vijnë të tjerët nga fundi i botës të punojnë në Shqipëri dhe këtu të gjithë duan rroga shteti. Punëtorët e Bashkisë të ndërmarrjeve, merrini dhe atashojini dhe ata të marrin më shumë. Që do të thotë janë punëtorë ndërmarrjesh, këta janë gati të punojnë, jepuani privatit, këta janë të gatshëm t'i paguajnë aq sa paguajnë dhe të paguhen më shumë. Punëtorët e ndërmarrjes e kanë për detyrë të punojnë, paguhen më shumë dhe kaq. Do ta bëjmë edhe këtë vendim, po e thashë paraprakisht që ta kombinojmë. Vijnë të tjerët nga fundi i botës për punë, këtej s'ka punë", tha Rama.
Kryeministri debatoi edhe me disa të rinj gjatë inspektimit që po rrinin në kafe, duke u thënë se pse nuk punojnë për rindërtimin, por një prej tyre u shpreh se e ka kryer shkollën për jurist.
Ndërsa sipas kryebashkiakut në detyrë të Durrësit, Varfaj për meremetimin po punohet “në dy fronte, në ambientet e jashtme të godinës dhe apartamente”, por nënvizoi ai, problem mbetet mungesa e fuqisë punëtore.
Faza e parë e rindërtimit mundëson rikthimin e të prekurve nga tërmeti në 1859 apartamente, deri në fund të muajit mars, në godinat e pabanueshme ku nevojitet vetëm meremetim. Kryeministri Rama theksoi se ndërkohë që vazhdon dhënia e lejeve për meremetimin e godinave të banimit, “për pak ditë do shpallim procedurën ndërkombëtare për banesat individuale”.
Debati i Ramës me të rinjtë
Rama: Po këta, urdhëro. S'ka punë dhe rrinë gjithë ditën. Hë mo çuna mirë? S'ka punë ëë
Djali: S'ka punë
Rama: Po hajde pra puno këtu
Djali: Ndërtim?
Rama: Pse ça do të punosh ti, doganier?
Djali: Kam mbaruar shkollën unë
Rama: Eeee... ke mbaruar shkollën ti
Rama: Jurist…
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
