Nga Gazeta 'SI' - Më shumë se 4.000 tendera janë dhënë në vitin 2023 në Shqipëri, përkthyer në një vlerë prej 111.8 mld lekësh. Shifrat raportohen nga Agjencia e Prokurimit Publik në analizën vjetore 2023. Nga viti 2022, edhe numri i kontratave edhe vlera e tyre është reduktuar.
Shumica e kontratave, kanë të bëjnë me ofrimin e mallrave, 2.785 të tilla, 1.528 për shërbime dhe 937 për punë civile. Për Rindërtimin janë shpallur 7 procedura me një fond prej 214 mln lekësh.
LEXO EDHE:
- Hyn në fuqi ligji i ri për Prokurimet / Të huajt dhe privati në lojë. Asnjë kufizim për offshore-t
- Projektligji / Konkurrenca do të hetojë edhe tenderat publikë
Gjatë 2023-shit asnjë nga kontratat e shpallura nuk ishte PPP apo koncesion.
7 nga kontratat e një viti më parë, APP thotë se i janë dhënë operatorëve të huaj, ndonëse nuk tregon llojin e kontratës. Nga këto, 2 ishin nga Austria, 1 nga Greqia, 1 nga Sllovenia, 1 nga Italia, 1 nga Gjermania dhe 1 nga Franca.
Shqipëria shpenzoi 9.4% të PBB-së për tendera gjatë vitit 2023 dhe kjo është shifra më e lartë në të gjitha vendet e rajonit.
Nga kontratat me fonde limit (ofrimi i një vlere në kufi të asaj të shpallur) raporti thotë se janë kursyer 15% e fondit total për prokurimet.
Sipas grafikut, megjithëse numri më i madh i procedurave të shpallura për vitin 2023, rezulton në muajin tetor, në total vërehet një numër më i lartë publikimesh të procedurave gjatë gjashtëmujorit të parë të vitit dhe sidomos në muajt shkurt, mars dhe maj, krahasuar me vitin 2022.
Ndërkohë qeveria ka miratuar ligjin e ri të prokurimeve publike, i cili në pak kohë do të fuqizohet. Një ndër pikat thelbësore të këtij ligji është centralizimi i prokurimeve në një organ të vetëm dhe skualifikimi i menjëhershëm i aplikuesve që nuk respektojnë kërkesat.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.