Pse Japonia ka kaq shumë njerëz që nuk kanë udhëtuar kurrë

Një sondazh i bërë vitin e kaluar nga kompania globale e inteligjencës Morning Consult tregoi se 35% e të anketuarve japonezë thanë se nuk ishin të gatshëm të udhëtonin përsëri, numri më i lartë i çdo vendi.

Tetsu Nakamura, profesor në Universitetin Tamagawa dhe specialist i turizmit, thotë se rezultatet nuk janë aspak befasuese.

“Në vitin 2019, edhe para pandemisë, japonezët që udhëtonin jashtë vendit të paktën një herë në vit përbënin vetëm rreth 10% të popullsisë”, thotë Nakamura.

Sipas një studimi që Nakamura bëri në vitin 2016, ka nga ata që ai i quan "pasivë", që thonë se duan të udhëtojnë jashtë vendit, por nuk do e bëjnë dhe ata që janë "mohues", që nuk tregojnë interes për të udhëtuar jashtë vendit dhe nuk do ta bëjnë.

Së bashku, këto dy grupe përbëjnë rreth 70% të të anketuarve në studimin e tij para pandemisë, me "mohuesit" që përbëjnë afërsisht 30% të tyre.

Të lumtur në shtëpi

Pavarësisht se Japonia ka pasaportën më të fuqishme në botë, më pak se 20% e japonezëve në të vërtetë kanë pasaporta në radhë të parë, sipas Ministrisë së Punëve të Jashtme të Japonisë.

Për disa nga personat që nuk udhëtojnë kurrë jashtë vendit, udhëtimet brenda janë të mjaftueshme.

“Shumë japonezë mendojnë se udhëtimi jashtë shtetit kërkon kohë dhe përkushtim”, thotë Nakamura.

Ai shpjegon se edhe personat që kanë dëshirë të shkojnë për të vizituar një vend tjetër, nuk shkojnë sepse i bezdis fakti se duhet të planifikojnë gjithë udhëtimin.

Kotaro Toriumi, analist japonez i udhëtimeve, thotë se vetëm mendimi i procedurave të ndërlikuara të udhëtimit jashtë vendit për shkak të pandemisë dhe rrezikut të infeksionit i pengon njerëzit të bëjnë udhëtime jashtë shtetit.

Më tej, ai pretendon se pandemia ka ndryshuar "mendësinë japoneze".

“Njerëzit që dikur udhëtonin, tani kanë frikë të shkojnë jashtë vendit për shkak të rrezikut të infeksionit, por janë mirë duke udhëtuar brenda vendit. Mendoj se po kuptojnë gjithnjë e më shumë se brenda Japonisë ka shumë pika tërheqëse turistike dhe njerëzit mund të argëtohen pa shkuar jashtë vendit”, thotë Toriumi.

Analisti vëren se njerëzit që thonë se "nuk duan të udhëtojnë më" thjesht mund të ngurrojnë të udhëtojnë derisa pandemia të përfundojë plotësisht.

Më pak para, më shumë probleme

Kostoja e udhëtimit është gjithashtu një pengesë.

Shumë punëtorë japonezë nuk kanë parë rritje page prej shumë kohësh ndërkohë që niveli i jetesës është rritur.

Më pak të ardhura të disponueshme do të thotë që të rinjtë mund të jenë më të prirur për të qëndruar në shtëpi ose për të eksploruar vendet afër.

“Krahasuar me gjeneratat e vjetra, të rinjtë kanë më pak gjasa të shkojnë jashtë vendit pasi nuk kanë shumë para. Për më tepër, shumë të rinjve u duket më e këndshme argëtimi në internet apo lojërat me telefona sesa udhëtimi jashtë vendit”, shpjegoi Toriumi.

Sipas të dhënave më të fundit nga Organizata Kombëtare e Turizmit të Japonisë, numri i udhëtarëve japonezë jashtë shtetit u ul me 86.2% në vitin 2022, me rreth 2.7 milionë njerëz krahasuar me shifrën 20 milionë në 2019.

“Ata që dikur shkonin vetëm sepse ishte e lirë ose nuk u pëlqen aq shumë të udhëtojnë, ata nuk po udhëtojnë më tani”, thotë Toriumi.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.