Rreth orës 04:00 të mëngjesit, rezistenca 2-vjeçare e grupit të aktorëve dhe anëtarëve të shoqërisë civile që ishin vendosur në mbrojtje të Teatrit Kombëtar u shemb. Bashkë me të nisi edhe shembja e godinës.
Operacioni i Inspektoriatit Kombëtar të Mbrojtjes së Territorit dhe Policisë së Shtetit nisi rreth mesnatës, fillimisht me afrimin e fadromave që do të përdoreshin për prishjen dhe më pas me afrimin e forcave të shumta policore (mbi 1 mijë të tilla), që përfshinë forcat “Shqiponja”, ato të Ndërhyrjes së Shpejt (FNSH) dhe policisë bashkiake.
Rreth orës 04:30 u dha urdhri i ndërhyrjes. Policia ndërhyri në ambientet ku ndodheshin aktorët dhe pjesëtarët e shoqërisë civile të ngujuar kundër prishjes së Teatrit Kombëtar dhe shpërndarja e tyre. Nga video e shpërndarë përmes rrjeteve sociale nga Aleanca për Mbrojtjen e Teatrit, përdorimi i forcës nuk mungoi. Regjisori Edmond Budina rrëfeu më vonë se aksioni ngjasonte me një operacion antiterrorist me policë që ishin të armatosur.
Aktivistët e AMT-së pasqyruan në rrjetet sociale të gjithë aksionin dhe u bënë thirrje qytetarëve për ndihmë.
Njëherësh me ndërhyrjen e policisë për të neutralizuar rezistencën njerëzore në ambientet e brendshme të teatrit, fadromat e IKMT-së nisën shembjen e tij. Fillimisht u goditën dhe hodhën në tokë fasadat e godinës së Teatrit Kombëtar dhe Teatrit Eksperimental.
Pasi largoi protestuesit nga territori i teatrit, një pjesë e të cilëve u shoqëruan nëpër komisariate, mes të cilëve edhe aktori Neritan Liçaj dhe kreu i Forumit Rinor të PD, Belind Këlliçi, forcat e policisë vendosën kordonet duke bllokuar hyrjen në drejtim të Teatrit nga ana e godinës së Bashkisë së Tiranës, hyrjen nga ana e Rrugës “George W. Bush” dhe hyrjen nga bulevardi qendror.
Pas orës 06:00 numri i qytetarëve që nisën të grumbulloheshin në bulevardin qendror duke u vendosur përballë kordonit të përforcuar të policisë në këtë pjesë nisi të shtohej. Pak më vonë atyre iu bashkuan edhe Monika Kryemadhi, Lulzim Basha dhe drejtues e ish-deputetë të opozitës. Përplasjet nuk munguan.
Protestuesit çanë për një moment kordonin e parë policor, por u sprapsën. Nga përleshjet policia shoqëroi një grupt tjetër qytetarësh, mes të cilëve edhe ish-deputetët e LSI-së, Endri Braimllari dhe Silva Cakaj, si dhe gazetarin Alfred Lela.
Basha deklaroi para mediave se kishte thirrur në një takim aleatët dhe do të dilte me një qëndrim, që do të ishte politik. Fjalën protestë nuk e përmendi, por ftoi qytetarët që t’i bashkoheshin qëndrimit politik që do të ndërmarrë opozita. Ndërkohë, Monika Kryemadhi tha se opozita “e ka shpallur luftën”. Rreth orës 13:00, opozita doli me një qëndrim të përbashkët: protesta me efekt të menjëhershëm, por duke respektuar rregullat anti-Covid19.
Në rrjetet sociale reagoi edhe “Europa Nostra”, agjenci që pak ditë më parë vendosi godinën e Teatrit Kombëtar në listën e 7 objekteve më të rrezikuara të trashëgimisë kulturore në Europë. Ajo e cilësoi një ‘ditë të trishtë’.
Presidenti Ilir Meta e cilësoi një akt mafioz, antiligjor, antikushtetues dhe imoral, që premtoi se nuk do të falet.
Ndërkohë, Kryemininstri Edi Rama i qëndroi larg kësaj çështje dhe në rrjetet sociale postoi një video nga sheshi “Skënderbej”, ku tregoheshin qytetarë që po shfrytëzonin hapësirat e këtij sheshi për të shëtitur e qëndruar nën rrezet e diellit. Videoja shoqërohet me një shënim të thjeshtë: “Tirana sot”.
Pamjet e shkëputura nga Kryeministri ishin pak metra larg skenës ku vazhdonte përplasja dhe loja e nervave mes protestuesve dhe Policisë së Shtetit.
Zyra e Bashkimit Europian në Tiranë reagoi duke shprehur zhgënjimin që prishja e godinës së Teatrit Kombëtar kishte ndodhur duke u shpërfillur kërkesa e BE për dialog mes palëve.
Ambasadori gjerman në Tiranë, Peter Zingraf e cilësoi të nxituar dhe të pakuptueshëm aktin në një kohë krize nga pandemia e koronavirusit të ri.
Bulevardit iu bashkuan me radhë protagonistët e Aleancës për Mbrojtjen e Teatrit, që ishin shoqëruar më herët në komisariatet e policisë, si Neritan Liçaj dhe Robert Budina. Mesazhi i tyre ishte i thjeshtë.
E gjithë kronologjia e këtyre zhvillimeve sugjeron se sot u luajt një tjetër akt, që mbetet për t’u përcaktuar nëse ishte akti i fundit i një kapitulli të vjetër, apo akti i parë i një kapitulli të ri. Ajo që është e sigurtë është se për 17 majin edhe njëherë tjetër do të flitet gjatë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.