.png)
Duke pasur parasysh kërcënimin e vazhdueshëm të koronavirusit, a është ide e mirë që fëmija im të kthehet në klasë? Disa mjekë pediatër në Nju Jork i janë përgjigjur kësaj pyetje.
"Unë nuk dua që fëmijët e mi të kthehen në shkollë pasi shkolla nuk planifikon të ndjekë udhëzimet për rihapjen. Ata janë 15 dhe 17 vjeç.
Sipas mendimit tim, nëse një shkollë nuk kërkon maska ose kur distancimi social nuk është i mundur, atëherë ajo shkollë nuk është e sigurt për fëmijët. Është detyra ime të mbroj shëndetin e fëmijëve të mi dhe unë synoj ta bëj këtë vetëm duke i mbajtur fëmijët e mi në shtëpi. Unë jam e vetëdijshme se jo të gjithë prindërit kanë luksin të bëjnë atë zgjedhje dhe unë jam duke luftuar që shkollat të bëjnë gjërat e duhura dhe të hapen me siguri, në mënyrë që të gjithë prindërit të mund t'i mbajnë fëmijët e tyre të sigurt nga COVID-19 " tha Joanna Dolgoff, një pediatre që punon në Gjeorgji.
"Siç thuhet, shkollat e fëmijëve të mi do t'i vendosin ato në grupe më të vogla këtë vit. Kërkohen maska dhe do të tentohet distancimi social. Shpresojmë që stafi dhe familjet do të kontrollohen çdo ditë për simptoma përpara mbërritjes, orët do të mbahen jashtë në ambient të hapur për aq kohë sa të jetë e arsyeshme.
Unë besoj se këto do të ndihmojnë, por më duheshin më shumë të dhëna, kështu që bëra disa llogaritje. Për mua, unë do ta dërgoja me lehtësi fëmijën tim në shkollë me këto protokolle sigurie nëse rreziku që dikush të ketë COVID të ishte më pak se 5%.
Në San Francisko, ku unë jetoj, një grup prej 10 personash ka një shans prej 9% deri 17% që dikush në grup të ketë COVID. Nëse kjo vlen për fëmijët në shkolla, a planifikoj ta dërgoj me vetëdije fëmijën tim kudo ku ka një shans 9% të COVID? Për mua, në asnjë mënyrë. Derisa nivelet e COVID të ulen në një nivel më të ulët ose të kemi një vaksinë ose trajtim efektiv, ne do t'i mbajmë fëmijët tanë larg shkollës. Një nivel i pranueshëm i rrezikut do të jetë i ndryshëm për çdo familje dhe çdo rrethanë. Ndarja e kohës time midis punës dhe përkrahjes së djemve të mi gjatë gjithë ditës do të jetë e vështirë, por unë shpresoj se mund të ulim nivelin e COVID dhe të ulim rrezikun e COVID për studentët, stafin dhe mësuesit tanë" tregon Natasha Agbai, një pediatre që punon në Discover Health Medical Group në San Francisko.
“Shkolla që fillon potencialisht për një muaj ndihet si një jetë në një pandemi. Unë kam qenë një pediatër për gati 15 vjet dhe kam një fëmijë 13 vjeç që fillon shkollën në vjeshtë. Si pediatër dhe si nënë, ndjehem sikur gjithçka varet nga ai rrezik që ne e shohim si të pranueshëm. Shumë prindër duhet të kthehen në punë për të ushqyer familjet e tyre. Situata nuk është njësoj për të gjithë kështu që unë mendoj se do të duhet t'i lihet hapësirë secilit prind. Të kesh një fëmijë që hyn në shkollë të mesme, megjithëse nevojat e tij sociale-emocionale janë jashtëzakonisht të rëndësishme, unë thjesht ndjehem sikur do të ishte më e sigurt nëse do ta mbaja në shtëpi. Së paku unë do të doja të prisja derisa të shohim si do të shkoje gjithë situata kur të hyjmë në sezonin e gripit" thotë një pediatër në New York i cili e praktikon profesionin e tij për gati 15 vjet.
"Unë kam një fëmijë 8 vjeç, një 5 dhe 1 vjeç e gjysmë. Nëse jam duke menduar me të vërtetë për këtë, thjesht nuk mendoj se vendi ynë është në një pozicion ku ne mund t'i dërgojmë me siguri fëmijët tanë përsëri në shkollë. Unë shoh se si fëmijët e mi po e trajtojnë këtë dhe unë shoh stresin, ankthin dhe trishtimin për të mos qenë në gjendje të shohin miqtë. Kështu që unë e marr kontekstin social-emocional të gjithë kësaj në një nivel personal.
Unë gjithashtu e shoh atë çdo ditë në pacientët e mi dhe shumë nga fëmijët për të cilët unë kujdesem janë të stresuar, të dëshpëruar, të vetmuar. Unë dua që ata të kthehen në shkollë por ne thjesht nuk kemi ende studime dhe të dhëna të mjaftueshme për të na treguar se si t'i qasemi me siguri gjithë kësaj" tregon një tjetër pediatër në Kaliforni.
"Unë do të doja që fëmijët e mi të ktheheshin në shkollë. Ata janë të dy në shkollë të mesme dhe vërtet kanë nevojë për një arsye për t’u ngritur, të vishen dhe të dalin nga shtëpia! Sidoqoftë, nuk dua që ata të hyjnë në një situatë që nuk është e sigurt. Unë pres që shkolla të hapet vetëm kur mund të vendosen strategji që tregojnë siguri.
Në përputhje me Akademinë Amerikane të Pediatrisë, shkollat duhet të hapen vetëm kur përhapja e virusit të ngadalësohet në mënyrë të vazhdueshme dhe të zbatohet protokolli nga të gjithë.
Kur këshilloj familjet, unë rekomandoj që ata të mendojnë për faktorët e tyre të rrezikut dhe nëse janë apo jo të kënaqur me atë që po bën shkolla ose rrethi i tyre për të ulur rrezikun e përhapjes. Prindërit gjithashtu duhet të marrin parasysh nëse mund të jenë në shtëpi me fëmijën e tyre për të lehtësuar arsimin në shtëpi apo jo.
Për të bërë çdo gjë më të lehtë për prindërit që punojnë, shpresa ime është që shkollat të jenë në gjendje të krijojnë besim dhe siguri kurdo që të hapen" tha Jaime Friedman, një pediatër në San Diego.
“Fëmijët marrin kaq shumë përfitime nga shkolla: Përveç mësimit, ata fitojnë aftësi sociale, ushqim, argëtim. Në mënyrë egoiste, unë gjithashtu përfitoj duke marrë më shumë kohë dhe hapësirë të qetë për të punuar nëse fëmijët e mi janë në shkollë. Por përhapja e COVID-19 mbetet shumë e lartë për kthimin e sigurt në shkollë. Fëmijët e mi janë 5 dhe 8 vjeç. Unë gjithashtu kam një vajzë 7-muajshe në shtëpi me nënën time që qëndron me ne për të ndihmuar me fëmijët. Kam shumë libra dhe fletë pune të shtypura për to dhe ne lexojmë së bashku dhe luajmë 'Sight Word Bingo' dhe lojra të tjera. Sinqerisht, unë nuk jam aq i shqetësuar për fëmijët e mi. Unë jam i shqetësuar që aq më shumë të shtyhet mësimi online, aq më shumë do të dalin në pah pabarazitë ekonomike dhe sociale, deri në atë pikë sa do të jetë e pamundur të rikuperohen gjërat. Jam i shqetësuar se mos ne po shkatërrojmë gjeneratën tonë të ardhshme" tha Joannie Yeh, pediatre në Filadelfia.
"Çdo fëmijë, qoftë mosha 4, 10, 14, apo 19 vjeç, është i ndryshëm dhe unë mbështes familjet që të marrin vendimet më të mira duke u bazuar në shkencë dhe informacione.
Unë shoh që ka vende që janë akoma "pika të nxehta", si ato vende ku jetojnë mbesat dhe stërnipi im dhe do të isha shumë e lumtur nëse ato vendosin të shkojnë në shkollë kur gjendja të stabilizohet. Ndërsa vazhdoj të lexoj studimet e tanishme, ndihem rehat në atë që di edhe pse nuk dimë shumë kështu që unë thjesht ndihmoj prindërit e shqetësuar të shqyrtojnë situatën e tyre dhe të marrin një vendim që është mirë për familjet e tyre" tha Mary Beth Miotto, pediatre në Nju Jork.
Burimi:Huffpost\Përktheu:Gazeta "Si"
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
