Presidenti Ilir Meta ka refuzuar që të emërojë Skënder Gjinushin në krye të Akademisë së Shkencave duke arsyetuar se angazhimi prej kohësh njëkohësisht në politikë dhe si anëtar i rregullt i kësaj akademie nga ish-kryetari i Partisë Socialdemokrate e bën procesin zgjedhor të 24 majit të pavlefshëm.
LEXO EDHE:
Zgjedhjet në Akademinë e Shkencave, Fuga: Edi, kur do të flasim?
Duke iu referua neneve të ligjit për Akademinë e Shkencave, Presidenti thotë se statusi i anëtarit të rregullt dhe të çdo funksioni tjetër drejtues në këtë akademi bie ndesh me funksionin politik si kryetar i një partie.
“Statusi i anëtarit të rregullt të Akademisë së Shkencave nuk mund të ushtrohet paralelisht me kryerjen e funksioneve drejtuese të larta në parti politike. Papajtueshmëria ligjore në ushtrimin e statusit si anëtar i rregull i Akademisë së Shkencave, e bën tërësisht procesin zgjedhor të pavlefshëm. Presidenti i Republikës nuk mundet të dekretojë emërimin e Kryetarit të Akademisë së Shkencave të Republikës së Shqipërisë në kushtet kur procesi zgjedhor, i realizuar për këtë funksion, është kryer në shkelje të përcaktimeve të ligjit nr.9655/2006”, thuhet në vendimin e Metës.
Pra, sipas arsyetimit të Presidentit, Skënder Gjinushi ka qenë në shkelje të ligjit për Akademinë e Shkencave prej kohësh, duke mbajtur njëkohësisht statusin e anëtarit të rregullt të saj dhe në anën tjetër postin e kryetarit të PSD-së.
“Rezulton se zoti Skënder Gjinushi ka mbajtur për një periudhe të gjatë paralelisht dy funksione, njëri politik si Kryetar i PSD, dhe tjetri si anëtar i rregullt i një institucioni shkencor. Kjo gjendje ka bashkekzistuar për një kohë të gjatë”, thotë Presidenti.
Vetë Skënder Gjinushi nuk e njeh dekretin e Presidentit, që nuk e emëron atë në krye të Akademisë së Shkencave. Ora News thotë se ish-kreu i PSD-së thotë se Presidenti nuk ka të drejtë që të mos e emërojë atë, pasi nuk është komision hetimor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.