Nesër do të mbahen zgjedhjet për kryetarin e Akademisë e Shkencave të Shqipërisë. Për këtë iniciativë, që në krye të herës akademiku Artan Fuga ka shprehur mendimin e tij, kundër, sepse ai e konsideron të pavend, që në këtë institucion të zhvillohen zgjedhje, pa u miratuar ligji i ri për “Reformën në Akademi”.
Nëpërmjet një postimi në “Facebook”, akademiku Artan Fuga ka reaguar sërish për reformën në Akademinë e Shkencave, ndërsa kërkon një përgjigje edhe nga kryeministri Edi Rama.
Në këtë postim Fuga shkruan se i drejton kryeministrit Rama tri pyetje, por jo si kryeministër. Në thirrjen e tij, Fuga përdor shprehjen e Ramës “kur do flasim” për zgjedhjet e 24 majit në Akademinë e Shkencave.
Akademiku thekson se duhet një përgjigje nga kryeministri, pasi heshtja e tij merret si aprovim. “Bën sikur nuk ke dijeni, sikur është gjë e vogël me të cilën merren “thikat” e dorës së dytë si Gjermeni, Shahini, Ikonomi? Ato lënë të nënkuptohet se nuk kanë çfarë të bëjnë ty! Hipokrizisë i beson ti tani??? Fol mor burrë! O mbroji o dënoji ato zgjedhje që të mbetet në histori gjykimi yt! Heshtja është aprovim!”, shkruan ndër të tjera akademiku Artan Fuga.
Edhe pse përgjatë dy viteve debatet për reformimin e Akademisë janë përqendruar edhe në faktin e kandidimit të një anëtari të vetëm në kryesinë e Akademisë, as në këto zgjedhje nuk ka kandidatura.
Akademia e Shkencave ka deklaruar edhe listën e kandidatëve për vendet vakante:
Akademik Skënder Gjinushi për pozicionin e Kryetarit të ASH-së
Akademik Vasil S. Tole për pozicionin e Sekretarit Shkencor të ASH-së
Akademik Salvator Bushati për pozicionin e Zv.kryetarit të ASH-së
Akademik Neki Frashëri për pozicionin e Kryetarit të Seksionit të SHNT-së.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.