.png)
Kryetari i Bashkisë së Mallakastrës, Qerim Ismailaj rezulton person i dënuar me tre vite burg nga drejtësia greke, fakt që nuk e ka deklaruar në formularin e dekriminalizimit të dorëzuar në Komisionin Qendror të Zgjedhjeve.
Dënimi është pohuar përmes një shkrese që Prokuroria e Përgjithshme i ka kthyer KQZ-së pas kërkesës së këtij të fundit për informacion shtesë.
Sipas përgjigjes së prokurorisë, Ismailaj rezulton i dënuar në vitin 2000 me vendim të formës së prerë nga gjykata e Kiosit me tre vite burg për konflikt dhe përleshje, e barazvlefshme me veprën penale “dëmtime të tjera me dashje” të parashikuar në Kodin Penal të Shqipërisë, që parashikon dënimin vetëm me gjobë.
Prokuroria e Përgjithshme u vu në lëvizje me kërkesë të KQZ-së dhe Partisë Demokratike, që në janar 2020 hodhi akuza se Qerimaj është dënuar në Greqi dhe e ka fshehur këtë dënim nga formulari i dekriminalizimit para se të zgjidhej kryetar Bashkie i Mallakastrës në zgjedhjet vendore të bojkotuara nga opozita në 2019-ën.
Kryebashkiaku i Mallakastrës ka mohuar që të ketë qenë i dënuar, por ka deklaruar se ka lëvizur disa në herë në drejtim të shtetit grek. Ai ka pohuar se ka jetuar në Mitilini të Greqisë gjatë periudhës 1998-1999.
Më pas ai është kthyer në Shqipëri, ku ka nisur punë si mësues në shkollën 8-vjeçare në Çorrush të Mallakastrës dhe më vonë ka punuar si Sekretar i Këshillit të Qarkut në Fier. Ai ka qenë edhe kryetari i ish-Komunës Kutë në Mallakastër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
