.png)
Republika e Maqedonisë së Veriut dhe Republika e Malit të Zi edhe pse anëtare të NATO-së, me status të vendit-kandidat për anëtarësim në BE, me raporte politikisht parimore e korrekte me fqinjët e saj, prapë vazhdojnë të jenë target i kërcënimeve të Republikës së Serbisë.
Stabiliteti i tyre shtetëror vazhdon të cenohet nga brenda, fuqizuar nga forca serbe e pro-serbe të cilat leksionet i marrin nga Beogradi zyrtar.
Mirëpo, edhe kërcënimet e drejtpërdrejta e në vazhdimësi nga Serbia janë aty për t’i kujtuar këto forca se kanë mbështetjen e hapur e të pa rezervë të saj. Bile, gjuajtja shkon aq larg sa prek edhe në sedrën e Aleancës veri-atlantike. “Ato (Mali i Zi e Maqedonia e Veriut) mendojnë se janë në paktin e NATO-së dhe se me këtë i kanë zgjidhur problemet e tyre…” kërcënoi hapur në një televizion kombëtar serb Ministri i Mbrojtjes i Serbisë, Milosh Vuçeviç.
Milosh Vuçeviç është zgjedhur kryetar i Partisë Përparimtare të Serbisë, pas largimit nga kjo pozitë e kryetarit e themeluesit të saj, Aleksandër Vuçiç, president aktual i Serbisë. Si njeri i afërt me Vuçiçin ai u zgjodh Ministër i Mbrojtjes i Serbisë. Prej marrjes së mandatit e deri më sot, Ministri Vuçeviç disa herë ka ngritur në nivelin më të lart përgatitor ndërhyrjen ushtarake rreth kufirit me Kosovën.
Shqetësim ky i krijuar me të drejtë për Republikën e Kosovës. Ai është angazhuar për blerjen e armatimit dhe fuqizimin e ushtrisë së Serbisë edhe nga vende të cilave iu janë vendosur sanksione, si Rusia, Irani.
Ministri Vuçeviç në kërcënimet e hapura të tij në mediumin kombëtar serb, Pink ka thënë se Mali i Zi dhe Maqedonia e Veriut e kanë zemëruar aq shumë Serbinë kur njohën shtetin e Kosovës, sa ky veprim ka për t'i goditur në kokë sikur që po goditet Ukraina.
“A po flenë të qetë miqtë tanë në Maqedoninë e Veriut? A flini të qetë? Ata mendojnë se janë në paktin e NATO-s dhe se i kanë zgjidhur problemet e tyre… Kjo është mantra e Malit të Zi dhe Maqedonisë së Veriut. Kur u bënë anëtarë të asaj sigurie kolektive, apo Aleancës së NATO-s, menduan se i kishin zgjidhur të gjitha problemet dhe se asgjë më nuk mund të ju ndodhë”, thotë Ministri i Mbrojtjes i Serbisë, Milosh Vuçeçiv.
Ky paralajmërim se Maqedonia e Veriut dhe Mali i Zi mund të përballën me probleme dhe se nuk do të jenë të qeta edhe nëse janë anëtare të NATO-së, duhet të jetë alarmues para së gjithash për Aleancën, e më pastaj edhe për qetësinë e afërsinë e rrymave politike të këtyre vendeve me Serbinë.
Çuditërisht as kreu shtetëror i Malit të Zi as ai i Maqedonisë së Veriut nuk pati ende asnjë reagim për këtë kërcënim të hapur nga ana Serbisë. Kjo veç se shqetësuese, tregon edhe për një pajtim të heshtur me kërcënuesin. Agresioni nacionalist serb me mbështetje të padiskutueshme të Rusisë, vazhdon të luajë rolin shkatërrues për paqen në vendet e Ballkanit Perëndimor. Kërcënimet e hapura, shkaktimi i problemeve, ndikimi në punët e brendshme të shteteve fqinje është kulturë politike e Serbisë.
Bashkimi Evropian padyshim se duhet të ketë rolin e vet, nga se veprimet e Serbisë në raport me fqinjët e saj, veç se nuk janë në frymën e BE, ato po bëhen për çdo ditë kërcënim i paqes e vullnetit euro-integrues të vendeve tjera të rajonit.
Burimi: The Geopost
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
