.png)
Historia e Davide Pecorelli-t, vazhdon të intrigojë me inskenimin e vdekjes së tij në Shqipëri, edhe pse u zbulua se është gjallë. Sipas mediave italiane, biznesmeni 45-vjeçar, i cili u zhduk për rreth 9 muaj, ka jetuar në Vlorë për pak muaj.
Ashtu siç shihet edhe në foton e siguruar nga Gazetasi.al, ai ka zgjatur dhe lyer flokët, ndërkohë që kalonte ditën me banorë e zonës në lagjen “Pavarësia”.
Ndryshe nga çfarë ka rrëfyer një ditë më parë në Prokurorinë e Perugias (“qëndrova në Medjogurje, kisha probleme ekonomike dhe kërkoja monedha antike ë ishullin e Montecristo-s”), zbulohet se ai verën e ka kaluar në plazh, me ushqime dhe shoqëri të mirë.
Përveç se bënte një “Dolce Vita” (Jetë të ëmbël), 45-vjeçari u kishte thënë të njohurve të tij se ishte një shkrimtar. Pas Vlorës, biznesmeni italian ishte larguar drejt Italisë. “La Nazione”, raporton se Pecorelli besonte në një legjendë të lashtë dhe kërkonte një thesar. Ai kërkonte thesarin e murgjve të San Mamilianos në ishullin Montecristo.
Gjetja e këtij thesari do ta ndihmonte atë të kthehej i pasur tek familja e tij dhe të shlyente borxhet e biznesit.
Ky fakt konfirmohet edhe nga gjetja e disa sendeve në dhomën e tij të hotelit në Giglio. Aty u gjetën harta të ishullit, thasë të zbrazët, çanta e shpinës me mjete të ndryshme pune.
Davide Pecorelli u zbulua se ishte gjallë në Itali për shkak se gomonia që përdorte me qira pësoi probleme në brigjet e Livornos. Autoritetet ligjore italiane nuk i kanë ngarkuar asnjë vepër penale deri tani, me gjithë dyshimet se ai vijon të mashtrojë.
Ajo që duket e sigurt, është se ai nuk ia doli. Dhe madje edhe për të marrë sigurimin e jetës, ai do të kishte nevojë për një certifikatë vdekjeje.
Por hetuesit menjëherë e kuptuan se bëhej fjalë për një gënjeshtër dhe Pecorelli ishte gjallë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
