Gazeta Si - Kreu i Partisë së Lirisë dhe ish-presidenti Ilir Meta është pyetur për tri orë në SPAK për çështjen e CEZ-DIA si person në dijeni.
Meta u shpreh se nuk ka lidhje me çështjen, ndërsa akuzoi Partinë Socialiste se e përdor në favor sa herë gjendet në vështirësi dhe krizë.
Ai tha se nuk ka lidhje me privatizimin e CEZ-it, pasi pohoi se në atë kohë nuk ka qenë ministër i Ekonomisë.
LEXO EDHE:
- Ish-deputeti i PD e ish-kandidati i PS kallëzon në SPAK Ilir Metën për paratë e lobimit në SHBA
- SPAK heton Metën, i kërkon KQZ-së formularin e dekriminalizimit të ish-Presidentit
- Tjetër padi ndaj Metës dhe Kryemadhit në SPAK, këtë herë për trajtimet estetike në një klinikë në San Marino
- ‘Kontrata lobimi deri në 1.2 mln $’, Valteri çon prova të reja në SPAK kundër Ilir Metës
“Kam pasur një ftesë për të ardhur në SPAK prej disa ditësh për një çështje të nisur kryesisht në vitin 2019. Kishte të bënte me çështja të CEZ dhe DIA, që është një çështje shumë e përsëritur dhe aktivizohet sa herë që Rilindja është në krizë. Por gjithsesi, unë tregoj sjelljen time prej shtetari me transparencë. Jam përgjigjur me qetësi dhe durim për t’i ndihmuar”, - tha Meta.
Ish-presidenti theksoi se dëshmia e tij për çështjen e CEZ-DIA vjen në një kohë kur ka mbrojtur interesin publik.
“Të gjitha faktet tregojnë që në çdo detyrë kam mbrojtur interesin publik. E kemi bërë detyrën tonë në mënyrë të shkëlqyer në mbrojtje të interesit të popullit“.
Meta u shpreh se ka dhënë sqarime që në vitin që është hapur kjo çështje.
“Kam dhënë sqarime që në 2015-ën pas një shkrimi të një kolegeje tuaj që manipulonte të dhënat e arbitrazhit në Vjenë, për të cilën kompania që mbronte shtetin shqiptar bëri një deklaratë publike. Meta nuk ka asnjë lidhje për marrëveshjen e nxjerrë, pasi është bërë kur nuk kam qenë Ministër i Ekonomisë dhe nuk kishte asnjë lidhje me CEZ-in".
Kreu i Partisë së Lirisë shpjegoi se, "gjatë kohës që kam qenë ministër, CEZ nuk ka përfituar asgjë nga qeveria, por madje kemi qenë dhe në debate të vazhdueshme, pasi ata nuk po bënin investimet që kishin marrë. Nuk kam asnjë lidhje me marrëveshjen. Dosja aktivizohet sa herë që PS është në krizë”, përsëriti ai.
Ndërsa kur u pyet sesi e lidh prokuroria çështjen CEZ-DIA me emrin e tij, Meta u përgjigj po shkurt: “Me portalet. Po bëhet një proces fare absurd”.
Duke folur më në detaje, Meta kujtoi: “Në dhjetor, pasi ERE mori një vendim, institucion i pavarur, që varej nga Kuvendi, ku favorizohej CEZ, që të shiste energji më lirë, Ministria e Ekonomisë e ka kundërshtuar këtë vendim të ERE-s. Drejtori i KESHI-t, Engjëll Zeqo i ka kundërshtuar, përplasja ka qenë aq e fortë sa më pas ish-kryetari i ERE-s dha dorëheqje”.
Afera CEZ-DIA, Kastriot Ismailaj i vetmi i dënuar
Për dosjen e CEZ-DIA është dënuar Kastriot Ismailaj, asokohe administrator pëe për mbledhjen e borxheve të vjetra për llogari të CEZ.
Ismailaj u dënua në vitin 2017 me 11 vite burg për “mashtrim me pasoja të rënda” dhe “pastrim të produkteve të veprës penale”.
Përveç dënimit, gjykata urdhëroi edhe sekuestrimin e 5 milionë eurove. Ai ishte administrator i kompanisë DIA, e ngarkuar për mbledhjen e borxheve të CEZ, ku u përfshi në një skemë mashtrimi, duke shkatërruar edhe raportet mes shtetit shqiptar dhe CEZ, me kosto të madhe për buxhetin e shtetit.
Ismailaj u arrestua në 12 maj të vitit 2015 nga Sektori i Pastrimit të Parave dhe ai i Krimit Ekonomik dhe Financiar ne Policinë e Shtetit për veprën e mashtrimit në shuma të mëdha dhe pastrimit të produkteve të veprës penale.
Në 6 muaj, 9 kompani private përfituan nga CEZ-i 12 milionë USD nga kontratat për mbledhjen e borxheve të papaguara.
Pjesën më të madhe të fondeve e ka marrë “Debt International Management”, e cila administrohej pikërisht nga Ismailaj, me 649 milionë lekë, ose gati 6.5 milionë dollarë.
Rihapja e dosjes pas kallëzimit të PS
Në prill të vitit 2022, SPAK ka rihapur dosjen e CEZ-DIA të vjedhjes së parave publike, ndërsa rihpaja e hetimit erdhi pas një kallëziimi në SPAK nga Partia Socialiste.
Skandali i ka fillesat në vitin 2009, kur OSSH shiti 75% të aksioneve tek CEZ-DIA, gjatë qeverisjes së Sali Berishës, ndërsa në vitin 2013, kur socialistët morën pushtetin, u bë ndërprerja e kontratës abuzive.
Prishja e kësaj marrëveshje që i shkaktoi buxhetit një dëm mbi 414 mln euro, u bë me argumentin se CEZ nuk kishte bërë asnjë prokurim për të importuar energji elektrike në vjeshtën e 2012, dhe në këto kushte e gjithë kërkesa për energji elektrike përballohej nga rezerva e kaskadës se Drinit.
Në fund të vitit 2015, Ministria e Energjisë dhe Industrisë që drejtohej nga Damian Gjiknuri, kallëzoi në Prokurorinë e Përgjithshme ish ministrat (Ridvan Bode, ish-ministër i Financave, Florion Mima, ish-ministër i Ekonomisë, Genc Ruli, ish-ministër i Ekonomisë etj) dhe ish drejtorët e Berishës për shpërdorim detyre në bashkëpunim dhe shkelje, duke favorizuar CEZ me çmimin e energjisë elektrike, faljen e detyrimeve dhe njohjen e borxhit të keq.
Por Prokuroria e Përgjithshme e drejtuar në atë kohë nga Adriatik Llalla, i shpallur "non grata" nga SHBA dhe i dënuar në mungesë me 2 vite burg për fshehje të pasurisë, e mbylli dosjen me arsyetimin se procedura e privatizimit të OSSH nga qeveria Berisha ishte në përputhje me ligjin.
Pavarësisht ankimimit nga socialistët, Gjykata e lartë konfirmoi mbylljen e dosjes nga një trupë gjykuese që sot vetëm njëri prej tyre nuk u dogj në Vetting.
Më tej, Kuvendi i Shqipërisë dhe juristi i CEZ Romeo Kara referuan edhe dy dosje të tjera në Prokurori, me prova të reja, ndërsa si të kallëzuar, u shtuan Sali Berisha, Shkëlzen Berisha dhe sekseri kryesor, Nuel Kalaj, por të dyja dosjet u pushuan.
Në 2016-ën, socialistët ngritën një komision hetimor përmes të cilit i kërkuan prokirorisë të hetojë Berishën dhe djalin e tij si persona përgjegjës për privatizimin abuziv të OSSH.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.