.png)
Gazeta Si - Katër punonjës policie të komisariatit të Manzës në Durrës, janë pezulluar nga detyra, pasi kanë lejuar që të largohet nga banesa e tij Afrim Kilën, për të cilin Gjykata e Apelit kishte caktuar masën e sigurisë ‘Arrest në shtëpi” me akuzën e “vrasjes me dashje”.
Bëhet fjalë për inspektorët B.V., K.D. dhe O.Sh., të tre oficerë të Patrullës së Përgjithshme të Komisariatit të Policisë Durrës, si dhe inspektorin, S.K., trupë shërbimi në Stacionin e Policisë Manzë.
Në një njoftim për mediat, Policia e Shtetit thotë se ‘4 punonjësit e Policisë janë pezulluar nga detyrat, pasi kanë qenë me shërbim, kur është larguar nga banesa e tij në fshatin Gjuricaj, Afrim Kila, për të cilin Gjykata e Apelit Tiranë, ka caktuar masën e sigurisë “Arrest në shtëpi”, për veprën penale “Vrasja me dashje”.
Ndërkohë, AMP-ja ka iniciuar hetim penal për këtë rast dhe në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Durrës, vijon puna për zbardhjen e rrethanave dhe përcaktimin ligjor të përgjegjësive.
Sipas burimeve paraprake, Kila u largua nga shtëpia në momentin që u njoftua se gjykata e kishte dënuar përfundimisht me 16 vjet burg.
39-vjeçari Afrim Kila në vitin 2020, në ambientet e një lokali në Ishëm, goditi me mjete të forta dhe më pas në rrugë me automjet, shtetasin D. (P). K., i cili si pasojë e plagëve të marra humbi jetën në spital.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
