Nga Ljuis Hemilton te Naomi Osaka, nga Janis Antentokoumpo te Megan Rapinoe: janë 8 sportistët që figurojnë në listën e 100 personazheve me më shumë influencë në botë sipas “Time”, që ka publikuar së fundi renditjen e vitit 2020.
Për 6 herë kampionin e botës në Formula 1, Ljuis Hemilton, është vlerësuar jo vetëm rendimenti i tij në pistë, por edhe impenjimi në luftën kundër racizmit. Hemilton konsiderohet si një frymëzim për të gjithë. E njëjta gjë vlen edhe për tenisten Naomi Osaka, e cila fitoi “Us Open”, duke mbajtur në çdo ndeshje një maskë me emrat e viktimave nga dhuna e policisë amerikane.
Duajn Uejd, ish-yll i NBA-së, bëri bujë me mbështetjen ndaj vajzës së tij transgjinore Zaja, kurse Megan Rapinoe, lidere e kombëtares amerikane të futbollit të femrave, u shndërrua në një simbol të luftës për barazi gjinore. Në këtë “betejë” ka shpenzuar shumë energji edhe Alison Feliks, kampione olimpike e 200 metrave. Antentokoumpo është vlerësuar, pasi ka udhëhequr protestën e Milluoki Baks, që refuzuan të luanin pas vrasjes së Xhakob Blejk.
Mes 8 sportistëve në listën e “Time” janë edhe Patrik Mahomes i Kansas Siti, lojtari më i mirë i finales së fundit të futbollit amerikan, si dhe Maja Mur, kampionia që ndërpreu karrierën për t’iu dedikuar kauzës së Xhonatan Ajrons, i liruar nga burgu pas 23 vjetësh për një dënim të padrejtë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.