.png)
Në momentin që protesta dhe rezistenca e studentëve protestues vijon prej 11 ditësh, akademiku i njohur Artan Fuga ka thelluar akuzat ndaj sistemit arsimor në vend dhe Ligjit për Arsimin e Lartë. Në një postim në rrjetet sociale, Artan Fuga shkruan se sistemi menaxhues i arsimit të lartë në Shqipëri ka rënë dhe është jo funksional si pasojë e Ligjit për Arsimin e Lartë.
Akademiku Fuga është i ashpër në postimin, duke thënë se gjithë struktura e krijuar nga Ligji i ri në Arsimin Lartë shqiptar është kaotik. Duke bërë një krahasim mes kompetencave që Ligji i Arsimit të Lartë i ka dhënë një profesori, Fuga thotë se ai ka më pak kompetenca se sa një punonjëse sanitare në fakultete.
“Një profesor ka kompetenca më pak në fakultet sesa zonja që pastron nevojtoret e kateve. Sistemi i sistemit të arsimit të lartë në kaos. I gjithë sistemi menaxhues i arsimit të lartë në Shqipëri ka rënë, është jofunksional, pa përgjegjësi personale dhe krejt absurd si pasojë e Ligjit për Arsimin e Lartë.
Agjencitë e parashikuara të Ministrisë të arsimit: drejtuar nga të paaftë, me borde servilash dhe marrin para pa asnjë punë. Kanë dhënë aprovimin për këtë gjendje të sëmurë! Bordet administrative të universiteteve, pa asnjë kompetencë financiare për të drejtuar. Politika financiare korruptive si trafik influencash midis lobeve brenda dhe jashtë universitare.
Senatet? Nuk e merr vesh i pari të dytin? Janë bërë pengesë për rinovimin e universiteteve.
Rektoratet? Gjysma e administratës nën rektorin, gjysma nën administratorin, nëpunësit kanë frikë e ndrojtje nga njeri tjetri.
Rektorati pa rektor sepse ligji e bën Rektorin e shkretë lolo në duart e vendimeve kolektive pa përgjegjësi personale të senateve. Senatorë nën kontrollin e ndonjë dekani që edhe firmos në emrin e tyre. Rektori me administratorin nuk kanë kompetenca të ndara qartë dhe i nxisin drejt marrëdhënieve konfliktuale. Në fakultete profesori është i barabartë në vendimmarrje po aq sa edhe zonja që pastron wc e fakultet. Juritë e dhënies të titujve dhe gradave krejt jashtë ligjit nga baza deri në ministri! Profesora me kile si kastraveca!
Departamentet, kanë çelësat e kashtës në dorë dhe vota kolektive bllokojnë çdo qendrim kritik ndaj vetvetes! Administrata ruan vendin e punës sepse e marrin për bythe dhe e hedhin në rrugë si qenin! Bibliotekat? Qesharake dhe krejt jashtë funksionit!
Këshillat studentore as ndihen dhe as nuk ua ka parë kush hajrin nga studentët. Nuk dihet as kush i ka nxjerrë këto 8 pika që ashtu sikurse janë formuluar me shkrim dore, mbi një copë letër, të pavotuara nga studentët, pa argumentuar se përse ato, rrezikojnë ta çojnë protestën stoike të studentëve në flluskë sapuni.
Nuk zgjidhen këto pa abroguar ligjin e poshtër të arsimit të lartë që e kanë mbështetur dhe konceptuar profesorë prej gjasme që po t'i gërvishtësh pak del se i kanë marrë titujt me mashtrim. Nuk zgjidhen me ndryshimin e njerëzve. Përndryshe hidhni poshtë 100 vjet shkenca të sociologjisë të administratës.
Çojeni Max Weberin për skrap dhe mbani ndonjë gjoja sociolog, plaun Mere të sociologjisë, me diplomë fallco që ka marrë titullin e profesorit në mënyrë të kundërligjshme.”- shkruan akademiku Artan Fuga në facebook.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
